Tras facer unha primeira análise dos Resultados das Eleccións Municipais 2023 na Costa da Morte Concello a Concello, facemos un repaso de datos global.

Ademais das 12 maiorías absolutas, os 2 concellos onde gobernará a lista máis votada (Corcubión e Santa Comba); e o caso de Muros onde un pacto BNG-PSOE podería darlle a alcaldía á candidata nacionalista; hai 4 concellos nos que os edís independentes terán a chave do goberno, puidendo formar goberno ou apoiando a investidura e ficando na oposición.

Todo nuns comicios bastante clásicos, no sentido de que os 3 partidos principais copan a meirande parte das corporacións.

Cifras globais

Analizando os 19 concellos, e repasando que o PP ten 7 maiorías, o PSOE 8, e o BNG 4, o repaso de votos é o seguinte:

• PP: 27.041 votos e 91 edís.
• PSOE 22.309 votos e 73 edís.
• BNG: 20.322 votos e 60 edís.
• Outros: 15 edís.

11 alcaldes/as repetidas con seguridade

11 alcaldes/as manteranse, seguro, no seu posto, ademais do relevo de Dumbría, onde se mantén o PSOE con Raúl González no posto de Pequeño.

• Cabana: José Muíño (PP).
• Camariñas: Sandra Insua (PSOE).
• Carballo: Evencio Ferrero (BNG).
• Carnota: Juan Manuel Saborido “Moma” (PSOE).
• Cee: Margot Lamela (PSOE).
• Coristanco: Juan García (PP).
• Laxe: José Luís Pérez Añón (PP).
• A Laracha: Jose Manuel López Varela (PP).
• Mazaricos: Juan Blanco (BNG).
• Vimianzo: Mónica Rodriguez (PSOE).
• Zas: Lolo Muíño (BNG).

Os 3 partidos

Os 3 partidos terán presenza en 16 dos 19 dos plenos:

• O PP ten presenza en todos os plenos.
• O PSOE queda fóra en Cabana e Mazaricos.
• O BNG queda fóra en Santa Comba.

Maiorías poderosas

A maioría absoluta máis poderosa será do PSOE de Vimianzo, co 71% dos votos colleitados. O PSOE tamén manterá outro feudo como de Dumbría, cunha lixeira baixada ata o 64%.

Pola súa parte, as maiorías máis claras do PP son as de Cabana e Coristanco, con 59 e 68% respectivamente.

O BNG manda en Carballo co 53% (con subida dun edil) e en Mazaricos co 50% (baixando un 8%).

Os Outros partidos

En 9 Concello os Indepentendes terán presenza plenaria. IxCee, Sempre Corcubión, Alternativa dos Veciños de Fisterra, Podemos Laxe, AIM Malpica, Espazo Común Mazaricos, Muros Centrado, IxMuxía, Partigo Galego de Ponteceso, Adiante x Ponteceso e APIN-Espazo Común Ponteceso.

Pero hai varios concellos que precisan atención pormenorizada. 

A Malpica de Cañizo

O caso máis paradigmático é o de Malpica. Alfredo Cañizo (AIM) leva tendo o bastón de mando na sombra dende hai varias lexislaturas, pero o da pasada foi xa o mellor exemplo do que poden as minorías nesta democracia de Hon’t: deu o goberno ao tripartito formando goberno con PSOE e BNG, pero a metade de lexislatura propiciou unha moción de censura contra o seu propio tripartito para pasar a formar goberno co PP.
Este 2023 pode que volva decidir co seu único edil, de non ser que PSOE e BNG (suman 6 edís) deixen gobernar á lista máis votada, o PP (con 6).

O Ponteceso común

O novo panorama político pontecesán merece unha análise pormenorizada. O PSOE de Carballido, tralas múltiples leas protagonizadas nestes anos, cae case 1.000 votos, de 8 a 4 edís. O PP sobe 1 edil (ata os 4), polo que para chegar aos 7, terá que apoiarse en varios partidos. Seguro no novo Partido Galego de Juan Vidal, que aparece con 2; pero tamén con Adiante por Ponteceso ou con José Manuel Pose Verdes de APIN-Espazo Común.

Fisterra da Alternativa

A irrupción de Alternativa dos Veciños provoca un envorco total en Fisterra, onde a veciñanza castigou ao goberno bipartito con 600 votos (practicamente os que leva AV). O normal sería que gobernase o PP, con maioría simple, pois parece pouco probable que PSOE e BNG apoiasen unha hispotética investidura da candidata de AV Áurea Domínguez.

A Muxía de Sar

En Muxía, a crise de goberno socialista provocou a perda de 400 votos. Case todos, e outros 200 populares, foron para o independiente Javier Sar, que entra con 2 edís, se cadra insuficientes para quitarlle a alcaldía a Iago Insua, unha vez que PP e IxMuxía necesitarían o edil do BNG para alcanzar a maioría, e Carlos Concheiro, aínda con moito que pensar, non parece disposto a devolverlle o poder á dereita.

Muros

Os resultados deixan un BNG moi reforzado, que tería que negociar co PSOE de Caridad González para investir a Ía Lago e sacar da alcaldía a Inés Monteagudo.

Máis info

• Resultados das Eleccións Municipais 2023 na Costa da Morte Concello a Concello
• Análise Só 3 cambios importantes tralas Eleccións Municipais de 2023 na Costa da Morte.