Facía a pasada mañá de luns a Plataforma SOS Sanidade Pública unha rolda de prensa para valorar a situación da Iniciativa Lexislativa Popular. Tras un par de meses de recollida de sinaturas, tamén pola nosa comarca en boa medida gracias ao traballo da Plataforma Pediatras e Matronas Xa, os responsables da Plataforma amosaron “gran satisfacción pola estupenda resposta da sociedade e a implicación da poboación xeral, que lles motivou para solicitar unha prórroga de tempo xa que hai unha gran demanda de localidades que queren estender a campaña e participar”.

Seguirán pois poñendo mesas informativas e de recollida de sinaturas diante dos centros de saúde, hospitais e mercados… poñendo o debate enriba da mesa e obrigando aos nosos políticos a tomar o asunto en serio.

Aproveitaron para lembrar os obxectivos da ILP, que non son outros que “resolver os terribles problemas actuais da Atención Primaria, xerados pola destrutiva mala xestión da Xunta de Galicia”. “A Consellería de Sanidade leva anos reducindo inxustificadamente o gasto da Atención Primaria e da Sanidade Pública no seu conxunto, provocando o desmantelamento do sistema sanitario público e favorecendo intencionadamente ao sector privado mediante a creación de novos concertos e novas privatizacións de servizos”, lamentaron.

Criticaron a “situación de presión” que sofren os profesionais, e consideran que “esta grave situación vén motivada pola terrible redución de persoal, chegando en moitos centros de saúde e PAC a quedar menos da metade do que había anteriormente”. Por iso piden “incrementar e dimensionar o persoal, priorizar a atención presencial, reabrir os centros e PAC pechados e acabar coa precariedade laboral”.

Máis concentracións

Tamén continuarán as mobilizacións en todas as localidades de Galicia, destacando que o 11 de novembro a plataforma do Grove concentrarase diante da Consellería de Sanidade, o 20 de novembro a plataforma de Pediatras e Matronas realizará accións nos ambulatorios, e o 30 de leste mesmo mes levarán a cabo concentracións coordinadas por toda Galicia.

Máis novas sobre recortes

• Outubro 22; Continúan recadando sinaturas para a ILP de SOS Sanidade Pública en Carballo e Ponteceso.
• Setembro 22: A Plataforma Pediatras e Matronas Xa! xa recolle sinaturas na comarca para a ILP de SOS Sanidade Pública.
• Agosto 22: Comeza a colleita de sinaturas para a ILP que vai salvar e fortalecer a Atención Primaria.
• Xuño 22: As Plataformas presentan unha ILP para crear unha lei que salve a Atención Primaria