Venres. 03.12.2021
El tiempo

Repaso ao 2011 na Costa da Morte

Repaso ao 2011 na Costa da Morte

Chegamos ao remate deste ano, e como non cómpre facer balance do acontecido na Costa da Morte durante este convulso 2011. Convulso por varios motivos, pero tamén alentador, cando menos para a familia QPC, que segue e segue crecendo como o demostraron o pasado mes os case un cento de colaboradores que tomaron a palabra. Pero xa falaremos do ano QPC, que antes temos que repasar os acontecimentos máis relevantes.

Comezaba o ano ben guerrilleiro e no que a actualidade sociopolítica nos puña na vangarda da información libre. A Operación Orquesta, que arrincaba o 31 de xaneiro cun longo, aínda inconcluso, proceso xudicial contra a corrupción nos Concellos de Cee, Fisterra, Mazaricos e Corcubión.
Estaremos atentos este 2012 ás novidades xudiciais dos 28 imputados entre alcaldes, concelleiros, funcionarios e empresarios.

Pero ademais de ser portada en todo o Estado por este caso de corrupción, a Costa da Morte tamén aparecía nos telexornais por algún motivo positivo, como a resurección da Fervenza do Xallas tras anos de loita pola defensa do noso patrimonio natural.

As Eleccións foron outros dos focos de interese deste ano. Sobre todo a nivel local, evidentemente, onde as eleccións municipais foron seguidas a través de QPC por milleiros de veciños.
Non centraron tanto interese na bisbarra as Eleccións Xerais, nas que a marea azul invadíu a Costa. Iso si, sorprende ver dous ikimaps tan diferentes en tan pouco espacio de tempo como o das municipais (con azul, vermello, celeste e mesmo verde) ao das xerais (monocromático).

Entrementres, o paro seguiu crecendo en todo o estado, e a emigración segue sendo unhas das lacras máis graves da nosa bisbarra. Por se fóra pouco non faltaron accidentes (novas ante as que non podemos evitar pinchar e botar un ollo), tanto na estrada, coma no mar e no traballo.

Pero tampouco faltaron as boas festas, como o cheo de cor Entroido fisterrán o con ese verán cheo de verbenas e patrimonio cultural e etnográfico. Ou historias tan fermosas como tráxicas, como a incrible historia de Pinio ou a solidariedade que amosou a cidadanía da bisbarra ante o berro de desesperación de Lidia e Jose.
O 2011 remata pero chega un 2012 do que prende un fío de esperanza e de cor, como promete a campaña Galicia en color. Como non, seguiremos en primeira liña.

Un gran ano para QPC

E queremos facer un repaso tamén ao ano de QPC, outro ano de constante crecemento chegando a un 30% máis de visitas e nun 50% de usuarios únicos que durante o 2010. Este ano foron uns 185.000 visitantes únicos os que pasaron por quepasanacosta.gal, completando unhas 665.000 visitas no último ano. Cifras que suman máis de 6 millóns e medio de páxinas visitas dende a nosa creación no 2007.

QPC segue a ser a referencia do Fútbol da Costa e este ano abrimos un novo servizo para os amantes das 4 rodas: QPC MOTOR. I é que será por servizos: Axenda Costa da Morte, Recunchos da Costa, Salvalcadelos ou Horarios de Autobuses dan conta do noso compromiso social coa bisbarra.

Coa bisbarra e cos nosos lectores, e de aí que nos sigamos empeñando en facer do xornalismo cidadán unha realidade neste recuncho do mundo. Por iso damos voz a todos os nosos colaboradores, que son os que realmente crean os contidos deste diario.

Miramos con bos ollos o 2012, que xa comeza dun xeito moi positivo espallando a nosa semente por todo o país a través da campaña Vitaminas para o galego, unha campaña que nos refrenda como referencia informativa da Costa da Morte para toda Galicia.

Sen máis, a familia de QPC e de Galinus, Taller de Novos Medios desexarvos que este 2012 sexa, cando menos, tan bo como este este 2011. Aí quedan pois os nosos desexos dunhas boas Licorkafestas!!

Novas QPC

Novas de actualidade do 2011

Fonte

comentarios