Xoves. 28.03.2024
El tiempo

Vimianzo e Laxe únense de novo para esixir que a Xunta comece o Plan Estratéxico dos Penedos

Foto Visita aos Penedos de Pasarela e Traba
As expedicións de Laxe e Vimianzo nos Penedos de Traba e Pasarela
Vimianzo e Laxe únense de novo para esixir que a Xunta comece o Plan Estratéxico dos Penedos

Xa van case dous anos dende que os Concellos de Vimianzo e Laxe comezaron a unir forzas para poñer en valor os Penedos da Traba e Pasarela. Era a primeira vez que as administracións se unían, en serio, para continuar un proxecto no que a sociedade civil ten volcado unha ilusión inmensa.

Tardou 10 anos a Xunta en sacar do caixón o proxecto de posta en valor do único espazo catalogado como Paisaxe Protexida, pero xa vai ano e medio dende aquela, e pola comarca non se teñen novas da administración autonómica. Tampouco os orzamentos se lembran dos Penedos.

Por iso, os Concellos volven camiñar da man para facer realidade o Plan Estratéxico, buscando o apoio da Xunta á que enviarán un escrito esta semana. Así o abordaron esta fin de semana nunha visita in situ das dúas delegacións municipais, formadas pola alcaldesa de Vimianzo, Mónica Rodríguez, o alcalde de Laxe, José Luís Pérez Añón, a concelleira de Cultura, Turismo e Promoción Económica de Vimianzo, Rosa Blanco, o concelleiro de Deportes, Protección Civil e Policía Local, Mario Andújar, a concelleira de Comercio, Hostalería e Cultura de Laxe, Raquel Lema Allo, así como os técnicos de deportes e Vimanzo, Víctor Santos, e de Turismo de Laxe, María Mato.

Ademais de ser Paisaxe Protexida, e dos singulares fitos xeográficos que a conforman, como a Torre da Moa, Pena Forcada, Pedra Cachucha, O Berrón, ou a Aguia, os Penedos contan cunha pegada cultural e literaria baseada en lendas e tradicións. Por todo iso, o potencial turístico deste espazo vai máis aló do estético, do científico, ou da práctica do deporte en contacto coa natureza.

Accións

Entre das accións propostas está sinalizar e acondicionar a ruta de sendeirismo que transcorre pola formación rochosa, habilitar prazas de aparcadoiro e mellorar o acceso aos visitantes.

Antes terán que definir as intervencións, tramitar os permisos da Xunta, e solicitar apoio económico da Dirección Xeral de Patrimonio Natural, dependente da Consellería de Medio Ambiente, Territorio e Vivenda da Xunta de Galicia.

Pero enfocan o proxecto en 4 fases, comezando polo deseño das rutas, pasando polas obras e equipamento, a homologación e a divulgación.

NOVAS RELACIONADAS

FONTE

Comentarios