O teatro invade a #AxendaCostadaMorte

Cultura Festas

08:00 23/10/15

Ano tras ano a Costa da Morte consolídase como un referente teatral grazas á gran cantidade de actuacións que inclúen os programas culturais de moitos dos concellos da bisbarra. Mostra diso queda plasmada na www.axendacostadamorte.com onde as citas teatrais ocupan unha boa parte da programación desta fin de semana que vén marcada polo cambio de hora. Como é habitual, antes de facer un repaso máis pormenorizado das actividades previstas, revisamos o parte metereolóxico de 4gotas.com que chega con cambios. "Aínda que estamos baixo o dominio das altas presións, a partir de hoxe unha nova borrasca alonxará o anticiclón de Galicia e permitirá a chegada dunha fronte desde o Atlántico. Deste xeito, o ceo permanecerá despexado na Costa da Morte ata a media tarde de hoxe, momento no que comezarán a entrar nubes deixando, xa de noite, o ceo toldado (incluso con precipitacións febles de madrugada na zona de Fisterra). A temperatura máxima será máis alta ca de onte, cos mercurios rozando os 20º. No día de mañá, a fronte (que con todo chegará moi desfeita) deixará orballos pola mañá acompañados de vento de intensidade moderada. Na tarde o ceo permanecerá anubrado pero a probabilidade de precipitación diminuirá. A máxima baixará por mor das chuvias febles quedando nos 17º mentres que a parte positiva é que a mínima subirá con tantas nubes no ceo marcando 14ºC. Xa o domingo, unha nova área de altas presións comezará a asomarse polo que o ceo quedará novamente despexado, subirán novamente as máximas chegando ata os 19º e o vento perderá intensidade".

Estreas no FIOT

Chega unha das fins de semana máis esperada do Festival Internacional Outono de Teatro de Carballo (FIOT). E o motivo é a estrea mundial da obra "Los esclavos de mis esclavos" que será mañá sábado ás 21 horas. A cita de hoxe, tamén moi esperada entre os seguidores do teatro galego, vén da man de Teatro do Morcego que trae ata Carballo a súa obra "Presidente". A función comeza ás 21 horas, ainda que un pouco antes (19 horas) os asistentes teñen a optunidade de conversar cos actores grazas ao "Café con..." . E xa o domingo, os cataláns Atresbandes estrean a obra "Locus Amoenus" dentro do ciclo OTNI do FIOT.

Máis teatro

Corcubión, Muros, Vimianzo e Laxe son outros dos concellos da bisbarra que tamén teñen as súas propias citas co teatro. Todas, excepto a de Laxe, son mañá sábado ainda que en horarios diferentes e co tempo suficiente para desprazarse dun lugar a outro. As familias con fillos teñen dobre oportunidade para desfrutar dun día de teatro. Pola mañá, ás 12 horas, Migallas Teatro trae ata a biblioteca da casa da cultura de Corcubión a actuación "Merenda con pan de millo". Xa pola tarde, ás 18 horas, preséntase no auditorio do centro sociocultural de Muros o espectáculo "O último dragón" da compañía Sarabela. E á noite (as 21 horas) a casa da Cultura de Vimianzo comezará a escachar de risa grazas a Malasombra Produccións que trae a súa obra "D.E.P. (A herdanza)" . O domingo continúa en Laxe a IX nostra de Teatro de Outono coa obra "O país dos mandóns" dos ferroláns Ghazafelhos Teatro. A cita é ás 19 horas no salón de actos municipal.

Música en Laxe

A Ventana de Laxe estará hoxe e mañá cargada de música. Xabier Díaz, co seu #TheTambourineMan recén estreado, trae esta noite, as 23:30 horas, o seu repertorio xunto coas Adufeiras de Salitre. Un concerto con música galega na que a percusión e a Costa da Morte xogan un papel moi importante. E mañá sábado, os Red Beard encherán de folk ao puro estilo americano o local de Laxe.

Conferencia de Ánxel Carracedo

A casa da Cultura de Cee acolle mañá sábado unha conferencia de Ángel Carracedo sobre o "ADN Forense"; unha das súas especialidades. A cita enmárcarse dentro das actividades de "O Mes da Fundación" organizadas pola fundación Fenando Blanco.

Sendeirismo

Senda Nova inicia este domingo a cuarta edición do "Outono en Marcha" coa senda das Capelas que discorre polo concello de A Laracha. Os interesados en asistir poden informarse en sendanova@hotmail.com ou no 696 155 232.

OktoberFest e música en Cee

Esta fin de semana, venres e sábado, o centro comercial Finisterrae de Cee celebra por todo o alto a OktoberFest onde non faltarán as xerras de cervexa, comida típica alemana, sorpresas e música. Outro dos locales de Cee no que haberá unha boa movida é na Coctelera, xa que hoxe a partir das 00:00 horas contan coa actuación de "Las chicas del swing".