A Pipa: A historia de sempre

A Pipa: A historia de sempre

12:43 07/03/17

O Ponteceso completa o quinteto de cabeza da Liga da Costa Repítese a historia unha xornada máis na competición da Costa, cos favoritos sumando de tres en tres e os equipos que loitan por escapar de quéimaa do descenso sufrindo o indecible por lograr resultados positivos. A nota máis destacada da xornada, polo negativo da mesma, é a perda do liderato do Dumbría en Primeira Autonómica, inesperada fai cinco xornadas, pero que é unha realidade. Positivo, o revivir do Outes, que logo de moitas xornadas sae de postos de descenso directo tras vencer ao Val do Ulla. Na Liga da Costa, o Corme non pasou apuros para superar ao farolillo vermello da clasificación, Laxe, ao que endosou un 5-1 final, e déixalle cada vez máis afastado de poder optar á permanencia, pese a que aínda restan nove xornadas e a reacción do Outes pode facer soñar que non haxa arrastres en Primeira, pese a que, de momento, son dúas os que se producirían. Os líderes, ao seu, sumar e permanecer invictos vinte e cinco xornadas despois. Non ceden os seus perseguidores, que seguen sumando de tres en tres, algún dun xeito impresionante, como o San Lorenzo, que gaña, golea e goza como nunca, e nesta oportunidade sumou os tres puntos na Rocheira de Coristanco e cun resultado que non deixa lugar a dúbidas de ningún tipo (1-5). O Baio, con doblete de MC, sumaba o seu triunfo 700 no seu xa longa historia, e vencía en Buño a un once local que está tonteando coa zona de descenso, e o 0-2 final deixa aos oleiros un punto por encima do descenso e aos baieses a unha vitoria do líder, Corme. Mazaricos e Ponteceso tamén alcanzaron senllos triunfos. Os primeiros, no seu terreo, superaron con amplitud a un Porteño que segue inmerso en zona de descenso, mentres que os segundos fixérono con máis sufrimento no difícil terreo do Monte Louro, cun gol en propia meta e outro de penalti, pero facendo méritos para sumar o triunfo o equipo de Barca. En Pino do Val, o once de Néstor Agra sentenciou na primeira metade, ao término da cal vencía por 3-0, mentres que na segunda metade baixou o ritmo e o Porteño logrou dous tantos para maquillar o resultado final. Nos duelos dos equipos que loitan por saír da zona de perigo, o Corcubión perdía no seu propio terreo ante o Cerqueda por 1-2, colocándose na penúltima praza da clasificación., nun partido con tres máximos castigos, dous deles transformados, un por cada equipo, e un detido polo meta local, Abe, aos sete minutos de xogo. O Cerqueda, con todo resolto, mantense na zona nobre, mentres que os derrotados necesitan reaccionar con prontitud. Empate en Cee nun choque onde os dous equipos buscaban a vitoria para asegurarse a súa praza en 2ª Autonómica. O 1-1 final non satisfixo a ningún, pero permite aos pupilos de Rafa País poñer oito puntos de distancia sobre a zona de queima, e deixa ao Baíñas, que empató con gol de Pablo Muiño, con catro puntos de vantaxe tras un comezo de competición pouco esperanzador. Tamén houbo empate en Camariñas, entre dous equipos que buscan escapar da zona de perigo, téndoo moito mellor o Camariñas que a Esteirana, por canto os locais se colocan con oito puntos por encima do descenso, estando os de Esteiro empatados a puntos co Porteño nesa loita por saír do pozo. O Camariñas, que marcou na primeira metade, viu como,a falta de dous minutos, a Esteirana empataba e sumaba un punto que pode valer unha permanencia. Castriz e Malpica brindaron un encontro con moitas alternativas, entre dous conxuntos que xa conseguiron os seus obxectivos para esta tempada, e ao final, os tres puntos caeron ao lado rossoneri, tras unha gran igualdade de principio a fin. Na próxima xornada dúas partidos chaman a atención polo moito que se xogan ambos contendentes, o Laxe-Corcubión, por unha banda, e a Esteirana-Buño, pola outra, e onde os que perdan poderían verse sentenciados ao descenso ou moi preto do mesmo. Os líderes visitan o complicado campo de Vimianzo, onde o Baiñas os recibirá coa intención de infrinxirlles a primeira derrota da tempada. Moi atentos a este duelo, e intentando gañar os seus, estarán Baio, que recibe ao Castriz; san Lorenzo, que se medirá en Verdillo ao Cee; Mazaricos, que renderá visita ao Camariñas; e Ponteceso, que se medirá a un necesitado Coristanco. O outro conxunto da zona baixa, Porteño, rende visita a un Cerqueda que está realizando unha excelente campaña e que ten todo resolto na mesma, do mesmo xeito que Malpica e Monte Louro que brindarán un choque coa tranquilidade que lles dá o estar situados na zona media-alta da táboa.

Tripla derrota en Preferente

Non sacaron puntos os tres equipos de Preferente nesta xornada, con derrotas pola mínima todas elas. O Xallas tiña un compromiso de altura coa visita ao Estudiantil, segundo clasificado, e un gol local, a falta de menos de quince minutos, supuxo a derrota para os pupilos de Iván Cancela, que se fixeron acreedores a un mellor resultado. Tamén buscou puntuar en Monforte o Sofán, ao que un tanto nos inicios da segunda metade, fíxolles regresar de terras lucenses co taboleiro a cero, pese ás oportunidades das que gozaron para lograr dar a volta ao marcador. En Vimianzo, o Soneira tiña un óso duro de roer no líder e case Terceira División, Noia, e o choque se decantou do lado visitante, pese a que os locais na segunda metade, envorcáronse en pos de alcanzar un mellor resultado que o 1-2 final. Na próxima xornada, gran partido en Paiosaco, onde o Xallas renderá visita ao terceiro clasificado coa intención de sumar puntos de face a estar na pelexa pola promoción de ascenso. En Sofán, derbi de gran necesidade para o Soneira, que necesita os tres puntos como auga de maio para poder ter opcións de permanencia ou, polo menos, para saír do descenso directo, pois probables arrastres de Terceira División, catro agora mesmo, fan que a salvación a marque o Atlético Arteixo, con nove puntos de vantaxe sobre os pupilos de Víctor Pazos.

Perda do liderato en Primeira

En Primeira Autonómica, o resultado máis rechamante, polo negativo do mesmo, é a perda do liderato por parte do Dumbría, ao perder no terreo do renacido Pobra, por 1-0, que deixa aos pupilos de Julián Ferreiro dous puntos por baixo do sorprendente Agolada, que derrotou con apuros ao Piloño. O Outes sae do descenso directo tralo seu gran triunfo en Val do Ulla, ao que coloca nesa praza. Os pupilos de Cambeiro traballaron denodadamente para conseguir o obxectivo, e comezan a ver a luz ao final do túnel, aínda que os arrastres de Preferente, que poderían facer caer a Bertamiráns e Soneira, fan que sigan estando a sete puntos da seguridade. Quen se complica a vida é o Sporting Zas, que perdeu no campo do Cordeiro, logo de adiantarse moi pronto no marcador, pero os locais empataron rápido e, na segunda metade, no último cuarto de hora, os sportinguistas cederían os tres puntos ao empuxe local. O Fisterra instálase de xeito case definitivo na zona nobre da clasificación cun triunfo, goleada incluída, ante o colista e virtualmente descendido, Villestro. E é que os verdes miran máis cara aos postos de cabeza que os de perigo. Na próxima xornada, Zas, Outes e Dumbría teñen a necesidade de sumar a vitoria nos seus respectivos terreos de xogo ante o histórico Lalín, Cordeiro e Escravitude, respectivamente, mentres que o tranquilísimo Fisterra renderá visita ao Piloño, verdugo do Dumbría.

Muxía, "case" en segunda

Conta o Muxía os días que lle restan para alcanzar o ascenso á Liga da Costa, un retorno case cantado desde o principio de tempada, onde os rojillos deixaron claras as súas intencións de ascender de xeito directo. Os doce puntos de vantaxe sobre o Ameixenda case o colocan como ascendido, pero ao contar cun encontro menos os ceenses, o aprazado ante o Cabana, onde están vencendo por 0-1, fan que o ascenso aínda non sexa unha realidade, aínda que podería selo na próxima xornada, onde o Muxía ten un óso duro de roer en Carnota, ante o Lira. A pelexa polos postos de promoción parece case decantarse para Nantón, pese a un momento dubitativo actual, que se viu superado polo Ameixenda no seu terreo de xogo por 0-1 e Volantes de Baños, pese á súa derrota co líder por 0-3, pois o Castrelo daba a de area e perdía por 2-0 co colista Camelle, e o Cabana tería que sumar a vitoria nos minutos pendentes ante o Ameixenda para recortar os seis puntos de desventaja, logo de ceder un empate a dous goles en Outes, tras gozar dun 0-2 a favor. Na próxima xornada, ademais do xa mencionado Lira-Muxía, o Volantes ten que superar ao Outes B do mesmo xeito que o Ameixenda é favorito co Seaia. O Castrelo queimará os seus últimos cartuchos de estar na promoción de ascenso recibindo ao Nantón, mentres que o Cabana é favorito na súa terrea fronte ao Camelle.

Manuel Corredoira, Entrenador UEFA PRO, Nacional Nivel 3 de Fútbol e Director Deportivo pola RFEF, formador da Escola Galega de Adestradores, actual coordinador das Escolas de Fútbol Base de Zas e Delegado da Federación Galega de Fútbol para a Costa.