Ás 3 travesías costeiras que entran no Circuito Costa Abanca, hai que sumarlle a Travesía a Nado de Camariñas a Muxía. A proba, que vencía o ano pasado o gran Javo Gómez Noya, celebrarase o vindeiro sábado 7 de xullo e a inscrición, que terá un custo de 10 €, poderase formalizar a través da plataforma www.championchipnorte.com ata o mércores 4 de xullo as 23:59 h. Poderán participar todas as persoas nadas no ano 2000 e anteriores, que terán que percorrer os 2500 metros en liña recta que separan o Náutico de Camariñas da Praia do Lago de Muxía.

Travesía solidaria

Como todos os anos, esta competición terá un carácter solidario, e todo o recadado irá para as arcas da Asociación Integral de Rescate de Emerxencias (A.I.R.E.) en favor das refuxiadas e refuxiados. Como actividade paralela, completando a desenvolvida o ano pasado nos CEIPs de Camariñas, este martes 5 de xuño, terá lugar no IES Ramón Caamaño de Muxía, unha charla educativa dirixida aos alumnos de secundaria. Será impartida por Diego Velázquez, bombeiro e tesoureiro de A.I.R.E. e Dona Teresa Mendi, coordinadora da mesma ONG, co obxectivo xeral de sensibilizar e promover espazos de reflexión sobre os procesos relativos ás migracións forzosas e ás condicións de vida e situacións sociais das persoas refuxiadas e solicitantes de asilo. Na 3ª Travesía a nado Camariñas – Muxía colaboran: ONG A.I.R.E., Conservas Boya, Club Náutico Camariñas, Cocacola e CDM Piragüismo Dumbría.

Novas relacionadas

https://quepasanacosta.gal/as-travesias-illas-sisargas-balares-e-fisterra-entran-no-circuito-costa-abanca/ https://quepasanacosta.gal/gomez-noya-demostrou-o-seu-poderio-vencendo-o-gran-fondo-e-na-travesia-a-nado/

Fonte

• Redacción de QPC (info@quepasanacosta.com).