Nova xornada pasada por auga a que afronta o Fútbol da Costa esta segunda fin de semana de febreiro.
Pero antes de repasar os partidos, achegamos o parte meteorolóxico que os compañeiros de 4gotas.com nos traen. Un parte que obriga ademais a suspender todos os partidos que se disputan en Cee: O venres tralo paso da borrasca Qumaira que deixou moito vento do toda a Costa, veremos un día de chuvascos e con vento forte á espera dunha nova fronte na tardiña que deixaría na noite e na madrugada do sábado chuvia e continuaría o vento. O sábado outra vez sería un día de chuvascos intermitentes, algún deles puntualmente forte e con sarabia. O domingo pode ser un día complicado. O mellor é permanecer atento aos prognósticos da web, 4gotas.com, porque poden ir cambiando.
A Previa
E comezamos a previa pola Preferente, cunha xornada clave, sobre todo para o Soneira, que necesita romper a xeira de 15 xornadas sen gañar ante un rival directo, o Riveira, situado, iso si, a 15 puntos. O XSC, tras 6 derrotas nos últimos 7 partidos, tamén necesita un cambio de rumbo, pero terá unha complicada saída ao campo do Estudiantil. Mentres, o Dumbría, na zona alta, visita ao San Tirso con gañas de ademais facer un favor aos seus veciños da zona baixa.
Partidos claves tamén na zona baixa da 1ª Autonómica. O Ponteceso ten un choque directo ante un Lamela tamén en descenso que vén de sufrir unha severa derrota en Pedra Queimada. E o que tamén necesita sumar é o Camariñas, pero o terá máis complicado coa visita do Agolada, 5º na táboa. Mentres, o Baio quere facer un favorciño aos seus vencendo en Amio, mentre a Esteirana ten que sumar ante o Puebla para non meterse en problemas. Ademais, O Malpica, por arriba, terá un choque directo ante o Villestro, 3º con 2 puntos máis que os de Baña.
Non hai enfrontamentos directos na 2ª Autonómica, ciun só partido adiantado ao sábado. Pero na 3ª Autonómica, ademais de 2 choques sabatinos, hai que destacar un igualadísmo Coristanco-Montelouro, ou un Cerqueda-Muxía con dous equipos que queren meterse na loita. Mentres, o líder trala tangana da semana pasada, visita a un Laxe que segue sen meter a primeira.
Arrinca ademais Liguila Previa á Fase de Ascenso á Liga Galega Xuvenil, cos 6 mellores equipos da categoría. O sábado, dous apaixoantes Malpica-Cabana e Corme-Dumbría, deixando para a mañá dominical un XSC-Esteirana tamén tremendamente igualado.
E chega ao seu fin a primeira fase da Liga Galega Infantil, cunha xornada moi importante para o Dumbría de Pablo Conde e o XSC de Víctor da Ponte. Ambos necesitan sumar puntos para afrontar con comodidade a segunda fase, na Liguilla por evitar o descenso, na que partirán coa metade dos puntos que fagan nesta primeira fase.
Novo choque directo entre os de arriba da 1ª Cadete, cun Zas-XSC intenso. Ademais, o Cabana recibe ao Baio, e o Fisterra descansa. E mentres en 1ª Infantil, Cee, Corme e Fisterra continúan a súa loita polo título e polo posto para a Fase de Ascenso a falta de 6 xornadas para o final.
E atentos estaremos aos Veteranos, unha vez que o Laxe recuperaba o liderato aproveitando a derrota do Soneira ante o Bértoa. Os laxenses terán unha complicada saída ás Redondas, ante un Cabana que se 5º a só 5 puntos, mentres que o cadro soneirán recibe a un frouxo Camariñas Vet. e o Coristanco, 3º, recibe ao Castriz.
