Resultados da xornada sabatina de #futboldacosta

Resultados da xornada sabatina de #futboldacosta

21:33 19/05/12

E sen parada (De tolemia, como apunta Alberto Pose), xa comezaron os cuartos da Copa da Costa. E xa o fixeron onte venres, para que a familia do Cabana puidese disputar 3 partidos seguidos a estas alturas da tempada. Onte os cabaneses, sen moita tensión, e pensando máis na Fase do domingo, caían 0-2 ante o Dumbría, que tamén xoga mañá na Preferente.

Na Copa había hoxe 3 partidos, xa que o Camariñas-Corme será o domingo. Pero a eliminatoria estrella, a que máis prometía, queda solventada co 2-5 que o Santa Comba lle endousou ao Soneira, tras 5 minutos finais de desconcerto soneirán. Un Soneira, que evidentemente pensa máis na Liga e reservaba moitos efectivos para o partido de mañá. Pola súa banda, o Santa Comba busca resarcirse de non ter acadado o ansiado ascendo e pensa, e moito, na Copa. Por certo, un choque que vivirá a segunda parte mañá na Liga e a terceira a semana que vén... como se fosemos da Champions
Ademais, o Cee superaba pola mínima ao Xallas, e deixa un 2-1 para a volta. E se por Santa Comba están soñando cunha semifinal de derbi, o Cee quere meterse e tamén quere quitarse o mal sabor do descenso demostrando por que é o Rei de Copas.

E hoxe tivo lugar a ida da Final da Copa Xuvenil nas Redondas. Cun choque apretadísimo, que deixa todo aberto para San Andrés.

En xuvenís tamén hai que destacar que o Baio xa ten rival, o San Marcos de Santiago, que por certo, xoga en campo de terra. Pola súa banda, o Malpica pensa no Lalín ou Estrada.