Na mañá de onte eran presentadas na Casa do Concello de Cee as Festas da Virxe da Xunqueira para este ano 2011. Os festexos desenvolveranse entre o 12 e o 16 de agosto, e será unha comisión de festas formada por Concello e veciños a que se encargue da organización. Dita comisión formouse como unha esixencia necesaria por mor das implicacións do rexedor na Operación Orquesta. Programa As festas da Xunqueira comezarán o día 12 co pregón a cargo do locutor da Radio Galega Luis Rial. O día 13 será unha xornada para adicala aos máis pequenos, con inchables e festa da escuma. Tamén haberá un desfile de cabezudos. Pola noite actuarán os Brothers in Band, que farán un tributo aos Dire Straits. O día 14 actuarán a orquestra Superstar e María do Ceo. O 15 farán o propio a Banda de Música da Escola Municipal de Cee con concertos e pasarrúas. Porán máis música as orquestras Compostela e América. Ademáis, a noite do día 15 haberá sesión de fogos de artificio. Xa por último, o día 16 tocarán a charanga NBA e a banda de música Unión Musical Ponteledesma. Actuará a orquestra Solara e tamén haberá unha gala musical para poñer o punto final ás festas, na que actuarán Lolita e La Guardia. Tamén contarán nesa noite cun musical dos anos 80 e coa actuación dun grupo de pop galego. O Concello de Cee aporta aos festexos 42.000 euros. Os membros da comisión aseguraron que o custe redúcese en 50.000 euros con respecto ao ano 2010.

Novas relacionadas

• O BNG de Cee propón a actualización de taxas para barracas e atraccións.
• As diferentes visións da festa do alcalde.
• Cee celebrou unha festa do fútbol base costeiro.

Fonte

• El Correo Gallego.
• Fotografía de Adrián Leira López.