Xa arrencende á copla do Entroido fisterrán

16:00 15/01/14

Apenas levamos dúas semanas de 2014 e os eventos festivo máis importantes do ano xa cobran protagonismo na vila do Cristo. Xa vimos o cartel da Semana Santa e hoxe coñecemos xa as bases do Entroido.
Unha festa que se celebrará o vindeiro martes 4 de marzo na Praza da Constitución fisterrá, sempre que non chova coma o ano pasado no que se trasladou o espectáculo ao Pavillón.

I é que o entroido fisterrán é moito máis que unha festa. É un espectáculo, unha demostración de arte retranqueira coa que nace o fisterrán medio. O Entroido máis tradicional da Costa da Morte é un dos últimos recantos onde a copla se mantén perfectamente viva.

Xa está aberto o prazo de inscrición para o Concurso de Comparsas, ata o 24 de febreiro. Comparsas que terán que ter un mínimo de 20 persoas, e que ademais da escenificación do Martes de Entroido, terán que desfilar cos seus traballados traxes na tarde do sábado 1 de marzo.

Coma sempre, o xurado tomará nota da Presentación (nunca baixan de 9 e o dicimos por propia experiencia como membros do xurado nos últimos 6 anos, e que sexa por moitos máis), a Calidade Artística (os bailes sempre son fantásticos), e o Contido das Letras, o gran baluarte do entroido da fin da terra. I é que esa ironía, esa acidez, esa mala leite feita copla fai deste Entroido algo especial. Estamos desenxando ver como o alcalde recibe en persoa, e disfrazado as pullas que ano tras ano lle lanzan os protagonistas. O alcalde e o resto de membros da corporación, que aquí non safa nin o último.

As comparsas loitarán polos 1.500€ do primeiro premio, 1.200 do segundo e 900 do terceiro, se ben o resto recibirán unha axuda de 300€.

Concurso Infantil

Tamén se celebrará o domingo 2 de marzo o Concurso Infantil de Disfraces, tanto individual como por Grupos de entre 3 e 20 rapaces. O disfraz, a maquillaxe e a orixinalidade serán premiados.