O Santa Comba proclámase campión da Liga Xuvenil Sur

Deportes Fútbol da Costa

16:32 13/02/11

Unha xornada para o final pero o Santa Comba sentenciou a curta Liga Xuvenil Surt. Nun abarrotado Municipal de Vimianzo, os xalleiros venceron e xogarán a fase de ascenso.

Soneira - Santa Comba (1-2)

SONEIRA: Víctor, Vicente, César, Pichón (Alberto, min.80), Dani (Cachirulo, min.78), Fernando, Cristian, Basti, Mayor e Isma (Curra, min.55).
SANTA COMBA: Pablo, Martín, Sergio, Dani, David Agra, Javi, Marcos, Diego (Tuñas, min.60), Iván (Roberto, min.70), Cristian (Pombo, min.85) e Anxo (Pablo Pérez, min.46).
Goles: 1-0, min.21: Fernando; 1-1, min.48: Pablo Pérez; 1-2, min.68: Marcos.
Árbitro: Rodríguez Campos (A Coruña). Expulsou a Fernando, do Soneira (min.78).
Campo: Municipal de Vimianzo, 300 espectadores

Ao igual que na liga Norte na que fai tres semanas Corme e Dumbría B se xogaban a liga nun partido, Soneira e Santa Comba fixeron o mesmo este sábado. Nun ambiente espectacular, cun Municipal abarrotado de xente o partido pronto colleu un color moi branco. O Soneira saíu moi forte e apenas daba opcións ao seu rival que estaba a mercé do equipo de Miguel. Basti e Dani puideron abrir o marcador, pero quen o faría sería Fer quen tras un centro raso de Isma por banda dereita marca a pracer ao lle gañar a partida aos centrais. O gol provocou o delirio da bancada. Os soneiráns non baixaron o ritmo e semellaba que o obxectivo era gañar o golaverage para poder cantar o alirón na casa. Mayor no minuto 24 lanzaba maxistralmente unha falta, pero o meta Pablo fixo todo un paradón cando balón ía por toda a escadra. A rentes do final viñeron outras dúas moi claras ocasións de gol, e as dúas nos pes de Basti, na primeira remata a media volta e manda o balón ao rentes do pau e na segunda, xusto antes do pitido do colexiado erra no man a man co meta, incomprensiblemente tira fóra con toda a porta para el, ocasións que non soe fallar o dianteiro vimiancés. Na grada, pese a ir gañando vían que se perdoara moito e non as tiñas todas con eles. Non tardou en demostrar o Santa Comba a máxima do fútbol de que o que perdoa perde. Xusto ao saír do descanso, un barullo aéreo na área soneirán é aproveitado por Pablo para marcar de cabeza. Pouco a pouco os locais fóronse do partido e Santa Comba sabedor de que o empate era un moi resultado, apertaron os dentes en defensa e lanzaban contras perigosas tanto por banda dereita como pola esquerda. Basti que estivo moi ben marcado durante todo o partido, foise do seu par e cedeu un balón para Fer, corría o minuto 59, pero este golpeou mal o balón e foise pegado ao pau. A partir de aquí, cada minuto que pasaba ía aumentado o nerviosismo nos vimianceses que acabo por alcanzar o máximo nivel, cando o xalleiro Marcos se interna por banda esquerda, se vai en primeira instancia do interior e logo de César e marcaba no man a man con Víctor. O gol provocou un xúbilo de explosión no banco e nos seguidores de Santa Comba que vían preto a posibilidade de resarcirse da liga perdida na última xornada o ano pasado en mans do Corcubión. De aquí ao final os xalleiros dominaron moi ben os tempos do partido e non permitiron nin unha soa ocasión de perigo na súa área. Javi puido sentenciar o choque e a liga no minuto 72, pero o meta Víctor desfixo o perigo. Mostra do nerviosismo e desesperación dos locais foi a expulsión de Fer, Rodríguez Campos, moi correcto en todo o partido, tivo que mostrarlle cartón vermello directo por protestas. Os minutos pasaban e os visitantes facían tempo para celebrar un liga na que souberon aguantar o pulso do máximo favorito, o Soneira, e gañarlle nos dous encontros nos que se enfrontaron. Ao final explosión de ledicia en toda a parroquia de Santa Comba e os xogadores correron a medio campo para celebrar un título moi traballado ata o final.