O Bloque Nacionalista Galego de Laxe presentou nos últimos días o primeiro tramo da súa candidatura ás vindeiras eleccións municipais. Segundo as verbas do seu candidato, Xosé Manuel Pose, “é unha candidatura deseñada para asumir o goberno”, da que destacou a “capacidade, a ilusión e o compromiso dos/as seus/súas integrantes”. Segundo Pose, “o BNG presenta a candidatura que Laxe necesita para saír da crise en que o ten sumido o goberno do PSOE”, e insiste en que as primeiras accións de goberno que tomarán serán: “un plan de viabilidade económica e unha auditoría interna para saber a realidade das contas municipais”.

Amplo traballo na sombra

Os nacionalistas laxenses destacaron o traballo realizado polo BNG na localidade, malia non ter representación na corporación, un traballo que calificaron de “moito máis intenso que o dos grupos que formaron parte do pleno nestes últimos 4 anos”. Deste xeito, fixeron referencia a iniciativas como a da cesión da Casa do Mar á Asociación de Discapacitados O Peñón (precisamente vemos na foto a inauguración), desbloqueo do dragado do Porto de Laxe, o freo a especulación urbanística no Campo do Escaravello e a proposta de modificación do dique de abrigo e construcción do dique exterior para dar solución aos problemas ocasionados polas correntes no areal e no interior da dársena, presentada hai poucas semanas no Congreso dos Deputados e no Parlamento galego.

Apostas

Os nacionalistas salientaron algunhas das propostas que o BNG vai a contemplar no seu programa, como son: saneamento integral, escola infantil municipal, medidas encamiñadas a reactivar o sector estratéxico por excelencia do concello como é o porto.

Novas relacionadas

• Ambrosio Oróns presentouse como novo candidato do PP de Laxe.
• Novas protestas dende o sector polo novo seguro do mar e pola Lonxa Comarcal.

Fonte

• Nota de prensa do Responsábel de Organización Consello Comarcal do BNG, Xosé Regueira.