Este mediodía aparecían numerosos medios de seguridade no porto de Laxe. Os Geas da Garda Civil xa levaban horas a pé de porto, e ás 14:34h, Protección Civil e a Policía Local de Laxe facían unha chamada ao 112 para solicitar a colaboración dos Bombeiros, para levar a cabo unha excarcelación. Un veciño que paseaba polo porto foi quen avistou o coche vermello aproveitando a baixamar das mareas vivas. Segundo nos informa o 112 Galicia, os Bombeiros tiveron que excarcelar dun coche sumerxido o corpo dun home de Vimianzo, que supostamente, levaba desaparecido dende hai 2 meses. Ao parecer, a familia denunciara a súa desaparición, e o home deixara unha nota na que afirmaba que ía desaparecer ao non soportar a situación de paro, polo que falamos dun novo caso no que a crise nos leva ao suicidio. As forzas de seguridade están facendo a correspondente investigación sobre este suceso, que podería ter diferentes explicacións. Estaremos atentos a calquera novidade.

Novas relacionadas

• 18-07-13: Sae ilesa do incendio do seu coche en Fisterra.
• 28-06-13: Falece unha muller ao incendiarse a súa casa en Muxía.
• 07-06-13: Un home falece en Malpica baixo o seu tractor.
• 05-04-13: Dúas mulleres son trasladadas ao Hospital tras un incendio nunha casa de Frixe.
• Cee e Vimianzo poden despedirse do Grumir.

Fonte

• Redacción de QPC ([email protected]).