Martes. 19.03.2024
El tiempo

A RAG celebra o 142 aniversario de López Abente compartindo varios poemas póstumos

RAG-LOPEZ-ABENTE-retrato de Quintás Goyanes
Retrato de Quintás Goyanes a Gonzalo López Abente
A RAG celebra o 142 aniversario de López Abente compartindo varios poemas póstumos

A tempestade

(…)
A rexa tempestade, o vento fero
e o mar que se retorce e ruxe de ira
non son capaces de torcer a senda
que sigue a barca miña.

É forte o corazón, o brazo é forte
i-o amor mais forte ainda.
Corre ben, negra barca, que o meu faro
coma unha estrela brila!
Meu amor, meu amor,
cara ti vou axiña!

  • Fragmento do poema “A tempestade”. Reproducido a partir do mecanoscrito de Bretemada.

Boa inciativa da Real Academia Galega, que este 24 de marzo celebra o nacemento de Gonzalo López Abente en 1878, compartindo varios poemas póstumos. A institución vén de completar a dixitalización das composicións que conserva do poeta muxián, agora dispoñibles en liña para todo o público a través do Arquivo Dixital de Galicia.

López Abente, considerado o poeta do mar por outro ilustre galego como Vicente Risco, “foi sempre un namorado dos silencios de Muxía, dos poentes enxergados dende a soleira da Nosa Señora, dos calmos paseares polas praias e costas e as terras que a ilas deitan pautadas por os ríos calados. A xeografía poética de López Abente alóngase pouco, afonda moito e tén a Muxía por síntesis, chave e rosa", como o despedía Ramón Otero Pedrayo na necrolóxica publicada no Boletín da Real Academia Galega tras a súa morte en 1963.

A Academia lembra o poemario editado en 1971 co gallo do Día das Letras Galegas celebrado ao seu nome: Monza de frores bravas para Nosa Señora da Barca, quince composicións dedicadas á virxe muxiá que Gonzalo López Abente lle entregara ao académico e daquela presidente da institución, Sebastián Martínez-Risco, en 1960.
Catro décadas despois sairía do prelo “Bretemada”, unha edición ao coidado de Miro Millar que reproduce cen poemas escritos entre 1917 e 1922. O fondo documental do creador de Muxía na RAG inclúe tamén outros poemas que foron igualmente dixitalizados, completando así o traballo previo de catalogación e descrición desenvolvido polo arquivo.

Bretemada de Gonzalo Lopez Abente

Artigos sobre López Abente

Novas relacionadas

Novas sobre os Premios López Abente

Comentarios