Corme e XSC a un paso dos títulos de Cadetes e Infantís

Corme e XSC a un paso dos títulos de Cadetes e Infantís

13:22 04/03/15

Queda só dúas xornadas para o remate das Ligas Comarcais. E a cousa está que ferve. Pero antes de repasalas ligas, saben que Malpica acollerá un novo curso de Monitor Deportivo, un título necesario para poder adestrar categorías base a partir da tempada 2015/16.

O Corme, preto do título dos Cadetes

Imaxe do Corme-Cabana cadete de hai duas semanas-Foto-Cabana

Despois do empate da finalísima de hai dúas semanas, Corme e Cabana afrontaban estas últimas xornadas como sendas finais. E foi o Cabana o que non aguantou a presión, e nestas dúas xornadas colleitou un empate en Arliña e unha derrota en Cee, que ademais lle pode custar cara.

Non cederon os cormeláns na súa visita a Muxía esta semana e vencían cun apretado 1-2 e case que celebraban o título (o pase á Fase de Ascenso á Liga Galega xa o ten certificado), pois xa sacan 6 puntos pero o golaverage individual en contra, polo que un empate esta semana en casa ante o Cee lle daría o título.

Será este un partido importante pois aínda está aberta a loita pola outra praza que dá acceso á Fase de Ascenso. O Cee necesita gañar en Corme e esperar que non o faga o Cabana ante o Fisterra, o 4º clasificado, xa con poucas opcións de meterse, pero con gañas de deixar claro que está entre os mellores. Así que será esta unha xornada no cumio co doble enfrontamento 1º-3º e 2º-4º, co título e a 2ª praza en xogo.

Loita aberta na 1ª Infantil

En Infantís hai só unha praza en xogo, a do título é a única que dá acceso á Fase de Ascenso, a pesar das eternas peticións do fútbol costeiro por amplialas. O que mellor o ten é o XSC, o equipode Rupper que mesmo goleaba aos Miúdos, 3º clasificado, e saca 5 puntos ao Fisterra. Pero ten un partido máis e lle toca descansar esta fin de semana aos xalleiros, polo que o Fisterra, se vence esta semana ao Outes, colocarase a 2 do líder, deixando todo para unha fraticida derradeira xornada.
Unha xornada, a do 15 de marzo, na que o XSC visitará a un dos de abaixo, o Vimianzo, sen nada en xogo, tendo que gañar pois non lle valería o empate ao ter o golaverage individual perdido cos fisterráns. Uns fisterráns que terían que gañar si ou si á Esteirana se queren soñar co título.

En todo caso, os números de XSC e Fisterra son merecedores dunha fase de ascenso, pois rondar os 100 goles a favor e recibir menos de 30 en 23 partidos, é un bo balance.