A fin de semana foi completa. Ducias de vilas celebraron as súas festas por todo o alto, demostrando que os entroidos en vilas como Ponteceso, Malpica, Cee ou Fisterra (xa pasamos de preto por alí) non teñen nada que envexar aos de lugares como Tenerife ou a propia provincia de Ourense. E se a Axenda Costa da Morte segue completa tanto para este Martes de Entroido como para a vindeira fin de semana (en Buño, Muxía, Cerqueda, Fisterra, Cabana...), imos facendo un repaso ao que aconteceu na fin de semana.

Entroido de Cee

O Entroido na vila da Xunqueira chegou por partida triple. Ademais do tradiconal concurso de comparsas, os maiores e os pequenos tamén o disfrutaron. Pero a cita coas comparsas ten que ser a protagonista. Este ano si que os veciños do esquecido lugar de Gures levaron o premio. Tralo Jures Park do ano pasado, este ano trasformaron a vila no "Juriátrico de Gures" co que levaron os 800€ do primeiro premio. Por detrás quedaron os do Barrio Pésimo de Ameixenda e os Faraóns de Pereiriña. En canto aos disfraces, as Mucha e Nucha levaron o premio á mellor parella. Pola súa banda, os pequechos do CEIP Eugenio López tamén celebraron o pasado venres a festa de Entroido, desta volta, no pavillón municipal. E ademais, Festa do Antroido no Centro Social foi espectacular. Bailaron ao ritmo do músico Tino e disfrutaron da degustación de produtos típicos desta época do entroido. Amancia Trillo, realizou o sorteo dunha cesta, que nesta ocasión foi parar a veciña Aurora Blanco.

Entroido para todos en Ponteceso

A participación veciñal nos actos de Antroido pontecesán foi máis que positiva. O pasado domingo máis de 500 persoas asistiron ao Desfile de Disfraces. I é que 350 eran participantes directos, tanto nas comparsas como nos desfiles. Houbo inchables, xogos, gloflexia, e degustación de chocolate e rosquillas... Diversión garantizada para toda a familia.

Fiolleira eléctrica en Santa Comba

E nos achegamos ata Santa Comba para dar conta da última revolución en materia gastronómica entroideira. A “Filloeira Electrónica” foi a protagonista da tarde do entroido xalleiro celebrado no recinto feiral. Máis de 1.000 persoas de todas as idades acodiron á cita onde se repartiron unhas 5.000 filloas. Aí é nada. Tomen nota que para manter o entroido hai que modernizarse.

Desfile multitudinario en Carballo

En Carballo, o Concurso e Desfile de Disfraces, Comparsas e Carrozas de Antroido tamén é unha cita obrigada. Como nos contan dende Carballo, a mirada de Don Carnal ofreceu unha panorámica da actualidade, coa presenza da Garda Civil e o seu límite a 110 quilómetros por hora, dos mineiros de Chile, do Papa Benedito XVI con botafumeiro incluído, ou coa visita do resucitado Michael Jackson.

Máis información

• PSOE de Cee: Festa do Antroido no Centro Social de Cee.
• Carballo.org: O Papa Benedito XVI e os mineiros de Chile, protagonistas no Concurso de Disfraces, Comparsas e Carrozas de Antroido.

Novas relacionadas

• O Entroido xa comezou a ferver en Fisterra.
• Os coles da Costa quentan motores para o Entroido.
• A gravación dunha «Polafía» rescatará no Entroido de Cerqueda romances, contos, lendas e vellas coplas satíricas.

Fonte

• Redacción de QPC ([email protected]).