As fincas son de pequeno tamaño e os veciños manifestan que os camiños son intransitables Dende fai anos, a parroquia vimiancesa de Carantoña reclama a mellora da estructura agraria. Precisamente o concello de Vimianzo vén de remitirlle a consellaría de Medio Rural da Xunta de Galicia as case 600 sinaturas entregadas pola veciñanza da parroquia de Carantoña solicitando que se inicie, de oficio, o proceso de mellora de estrutura agraria da parroquia. A estrutura agraria da parroquia de Carantoña está na actualidade dominada polo minifundio, con fincas moi pequenas e camiños, de facto, intransitables o que supón un atranco para o desenvolvemento agrario e gandeiro da parroquia. A concentración das fincas e a mellora das vías de comunicación agrarias parroquiais é unha demanda manifestada en diversas ocasións pola veciñanza. O alcalde, Manuel Antelo, apoia as demandas veciñais e considera de vital importancia o desenvolmento, por parte da Xunta de Galicia, dun proxecto de mellora da estrutura agraria da parroquia. Considera, coma os veciños e veciñas, que o desenvolvemento dun proxecto deste tipo contribuirá ao desenvolvemento agrario e gandeiro da parroquia e á posta en valor das terras de labor. O alcalde anuncia que este asunto será levado ao pleno da corporación proximamente para que o concello lle traslade, de maneira formal, a solicitude do inicio dun proceso de mellora da estrutura agraria da parroquia á Xunta de Galicia. Novas relacionadas

• Os veciños de Carantoña queren concentración parcelaria
• 2014: Os veciños de Carantoña terán que esixir á Xunta os montes Milleira e Gorreis

Fonte

• Redacción QPC (info@quepasanacosta.com)
• Concello de Vimianzo