Segue a ser unha realidade a aposta polo patrimonio do novo goberno do Concello de Vimianzo. E unha das bandeiras soneirás é o singular Castro das Barreiras, o expediente X dos castros galegos. Así, despois da limpeza realizada o pasado mes de xullo e da escavación realizada a comezos de ano, o Concello de Vimianzo será pioneiro en Galicia facendo unha segunda escavación nun só ano.

Así o confirma a alcaldesa Mónica Rodríguez e a concelleira de Cultura Rosa Blanco, que ten preparados 15.000€ para unha nova actuación da man do profesor Tito Concheiro, arqueólogo a fronte do proxecto arqueolóxico que pretende converter o Castro das Barreiras “nun equipamento cultural”. As previsións dos arqueólogos, explicou Concheiro, é a de deixar a metade do castro a descuberto e a outra metade tal e como está, para poder así “admirar como foi afectando ás construcións o paso do tempo”.

A peculiaridade da muralla

Concheiro salienta o bo estado de conservación da muralla, construción de referencia dos asentamentos que, segundo Concheiro “imprime carácter” aos pobos que protexía. No caso de As Barreiras, existen xa algunhas prospeccións e os arqueólogos agardan nun futuro poder estudar o modelo construtivo e a evolución da muralla nunha parte onde se conservan muros de grande altura.

Novas relacionadas

• Xullo 2019: Vimianzo mantén viva a aposta polo patrimonio e volve limpar o Castro das Barreiras.
• Un verán para coñecer, a través das visitas guiadas, o rico patrimonio vimiancés.
• Vimianzo afonda, como capital europea, en estratexias concretas de patrimonio e desenvolvemento rural.
• Marzo 2019: Nenxs e maiores danlle sentido ao Castro das Barreiras.
• Febreiro 2019: “É unha honra que un concello tan pequeno como Vimianzo aposte pola arqueoloxía como motor turístico”.
• Maio 18: A excavación do Castro das Barreiras pecha cun gran achádego metalúrxico.