Sábado. 11.07.2020
El tiempo

Unha Semana Cultural de cine no IES de Baio

Unha Semana Cultural de cine no IES de Baio
Semana Cultural no IES Baio 2014

Esta pasada semana disfrutamos coa fantástica Semana do Libro do CEIP Santa Eulalia, en Dumbría. E hai 3 da Semana Cultural do IES Ponteceso. Hoxe imos ata Baio, onde precisamente comeza a Semana Cultural do IES Maximino Romero de Lema.

Este curso o cine será protagonista, pero tamén haberá música, teatro, poesía, pintura, futbolín, arqueoloxía, gastronomía… Un compendio que fará aprender aos alumnos dun xeito moito máis directo e dinámico que a base de libros.

A Semana, que durará estes 28, 29 e 30 de abril, arrincará cunha xornada de portas abertas e un xantar popular. O foguete sonoro desta novena edición correrá a cargo do radiofónico veciño Josiño Mira, que levará aos alumnos ao marabilloso mundo da radio e porá cara a unha voz moi coñecida por todas e todos nós. “Un nordés de anécdotas de toda unha vida nas ondas”.
A música e o futbolín tomarán o protagonismo da man de Xurxo Souto, que exercerá como mestre de cerimonias dunha partida brava de matraquiño para homenaxear ao seu inventor, Alexandre de Fisterra.
E falando de mestres, terán a fortuna de contar con Felipe Senén para namoralos da arqueoloxía. Teñen convidado ao alumnado do IES Marco do Camballón de As Cruces co cal están a elaborar un proxecto denominado “Palabras de Pedra”, e tamén haberá visita a Dombate e Borneiro da man de Manuel Gago. Dous fenómenos investigadores e mellores comunicadores.

A Sesión Matiné correrá a cargo este ano dunha das bandas de metais máis explosiva do planeta, “A Magnifique Banda dos Homes sen Medo”. Pura adrenalina para bailar e gastar pista antes do “II Xantar e Xuntar”, nos que a ANPA e o alumnado de 4o da ESO sorprenderán con un churrasco para 200 persoas. (Os cartos recadados do xantar, serán destinados a sufragar os gastos da excursión de fin de curso).

De cine

Este ano é o ano do cine no Centro baiés. E para abrir bocas estará o galardoado Óscar Aramburo. Haberá tempo para un coloquio con Nuria García, veciña e directora dunha das curtas máis agardadas do momento. Tamén realizarán cine con móbiles, coa colaboración do ex- alumno Víctor Mira e farán unha viaxe pola historia a través do cine con Víctor Vázquez. Rematarán con unha homenaxe cinematográfica ao Futbolín, proxectando unha película de animación dirixida por Juan José Campanella.
O teatro terá unha forte presenza un ano máis, posto que asistirán á escenificación de “Os caprichos do teatro” da man de Os Quinquilláns e a colleita propia do grupo do instituto, Carabullo Teatro -dirixido por Ricardo Vigueret- coa obra “TVKK”.

Haberá tamén un par de exposicións fixas. A primeira pretende ser un achegamento ao mundo do asociacionismo e ao activismo cultural, con diverso material do “Asalto ao Castelo” de Vimianzo.

A lingua é outro eixe vertebrador da semana. Un ano máis o alumnado seguirá viaxando á Lusofonía con un curso de portugués de iniciación.

Ademáis adentraranse na poesía e as rimas, conxugando as bases do hip-hop do alumno Alejandro coa arte poética de Ramón Blanco.

No último día está programada unha saída a Outeiro de Rei para visitar a casa museo de Manuel María. Unha viaxe perfecta para pechar unha Semana Cultural de cine.

Novas relacionadas

Fonte

comentarios