Pazos de Merexo xa ten o seu disco

Muxía Cultura Vídeos

Pazos de Merexo xa ten o seu disco

12:45 09/04/15

Libro Disco Pazos de Merexo-O acordeon diatonico da Costa da Morte

Unha alegría completa a que nos proporciona a publicación do primeiro libro-disco de Pazos de Merexo. I é que ademais de sentirnos orgullosos do noso patrimonio vivo, como é Pazos, a culpable desta histórica edición, aCentral Folque contou con QPC para completar o disco. Alí estabamos nós aquela máxica noite no Couto con Kepa Junkera e Pazos de Merexo, e realizamos unha grabación que nos pediron para engadila no cd e que estivemos encantados en compartir e da que podemos ver un anaco neste vídeo.

Un Pazos que nós coñecíamos en clave de loita social, naquelas manifestacións contra o Plan Acuícola durante o 2008, e nas que aos seus xa máis de 85 anos levaba o seu acordeón ao son do #Merexononsevende. Un Pazos que aos mestres da editorial, lles recorda a un “vello tocador de blues”, e esa idea foi a orientiou a Eutropio Varela na sesión de fotos que dá portada ao libro-disco.

Kepa Junquera e Pazos de Merexo no Couto from quepasanacosta on Vimeo.

A Presentación pública

Presentacion do libro disco de Pazos de Merexo

Así, despois de, aos seus máis de 85 anos, recibir o Premio María Amelia e o Premio Nordés, o bo de Pazos asistirá á presentación do seu primeiro libro-disco: “Pazos de Merexo, o acordeón diatónico da Costa da Morte”. O acto de presentación será este próximo domingo ás 11:00h no Salón do voluntariado en Muxía coincidindo con a entrega do premio María Amelia.
Logo haberá un xantar-acordeonada no restaurante Riojano no que acordeonistas de todo o pais se achegarán para compartir este momento tan especial con Pazos. Para acodir habería que reservar por telefono no restuarante Riojano 981 742 320. A data limite para facer a reserva é este venres dia 10.

Na presentación intervirán os autores Xurxo Souto e Pedro Pascual, o editor e director da colección Chave mestra Ramon Pinheiro e o alcalde de Múxía, Félix Porto. Como feche está prevista a intervención musical de Pazos de Merexo acompañado de novos e virtuosos acordeonistas de distintos pontos de Galicia, entre eles, os seis netos.

Historia viva

O libro-disco “Pazos de Merexo, o acordeón diatónico da Costa da Morte”, recolle os periplos vitais e as obras do repertorio de Pazos do Merexo, o último maestro do acordeón diatónico de Galiza. O libro conta con abundante documentación gráfica, e unha cuidada presentación, e se presenta ademais cun Cd no que podemos escoitar en versión orixinal unha selección de gravación inéditas de Pazos do Merexo realizadas no últimos vinte anos polos investigadores Olga Kirk e Pablo Díaz. Ademais inclue unha selección das aparicións de Pazos de Merexo en programas de TVG como Alalá –no que aparece acompañado polo acodeonista Brais Maceiras- ou Luar. Tamén a súa recente colaboración con Kepa Junkera recollida no doble disco Galiza con o que o vasco homenaxeou a música galega.

Xurxo Souto e Pedro Pascual, os dous autores do libro, son profundos coñecedores da dimensión musical de Pazos e do que supón no contexto da Música Popular Galega como un referente único e inescusábel para as novas xeración de músicos e afeizoados. Ambos teñen compartido inúmeras horas con Pazos tanto en Merexo como en distintos pontos de Galiza e teñen sido destacados divulgadores entre músicos e público tanto da sua figura como do seu repertório e técnica interpretativa.

O reputado fotógrafo Eutropio Varela, e os divulgadores Ramón Pinheiro Almuinha e Pedro Pascual son os culpables desta edición enmarcada na colección ”Chave Mestra” de aCentral Folque, unha colección que afonda no coñecimento de personaxes históricos do patrimonio musical e oral galego. Artistas que destacaron e ofreceron a súa personalidade, bon facer e axudaron a transmitir un coñecemento esencial do presente cultural galego. Gaiteiros, zanfoneiros, violonistas, narradores, acordeonistas… Aquí comeza unha serie de publicacións para rescatar, descubrir e divulgar, figuras indispensabeis da cultura tradicional galega. Libros de alta calidade con fotos inéditas, ensaio histórico e musical, transcrición de partituras e CDs con gravacións orixinais e inéditas en cada unha das publicacións.