Unha Gran Burla Negra organiza un seminario online para repasar os Arquivos do Prestige

Unha gran burla negra arquivos seminario

08:26 18/11/20

Cando se veñen de cumplir 18 anos da catástrofe medioambiental do Prestige, os arquivos da memoria seguen actualizándose con documentos e contestemuños. Así o entende necesario o colectivo Unha Gran Burla Negra, con quen este verán xa repasamos os “Arquivos do común” no Museo Man de Camelle, non sen certa polémica.

Este novembro volven á carga. Ían ser unhas sesións no Museo do Pobo Galego, pero o Seminario Os “favoritos” do trasno: Arquivos cidadáns e memoria democrática vaise desenvolver integramente pola rede.

Entre os organizadores, que queren afondar no movemento #NuncaMáis, atopamos Germán Labrador, Jorge Linheira, Daniel L. Abel, ademais da nosa María Bella.

As sesións, retransmitidas a través da plataforma Zoom, arrincan o venres 20 de novembro ás 10:00h e durarán todo o venres e a mañá do sábado. Pasarán pola pantalla na primeira sesión a cineasta Xiana de Teixeiro, a artista Carme Nogueira ou a historiadora da arte Sabela Fraga. Despois da pausa-café doméstica, tocará o turno a Horacio González, Manuel Sendón e Lara Barros.
Pola tarde Anxo Rabuñal e Marta Pérez Pereiro predecerán a dous dos organizadores, antes de que pasen a falar representantes de colectivos tan activos como o Cineclube Compostela, a Asociación Patio de Butacas ou a redenasa.tv.

O sábado comeza coas experiencias de Lourenzo Fdez. Prieto, Joan Morera Arbones, Xoán Carlos Garridoe, e Xurxo Ayán; e remata con Carlema Montero, Xosé Lois Vázquez e Xavier Paz, e os organizadores Daniel L. Abel, María Bella, que repasará o “arquivo” en clave feminsita.

Máis información e inscrición

Poden consultar aquí o programa completo e realizar a inscrición enviando un correo a [email protected] indicando no asunto ‘Inscrición seminario – arquivos do trasno’.