O vindeiro xoves, 3 de marzo, arrancará a segunda fase do proxecto de cooperación “Nuevos Horizontes” no que participa o GDR Bergantiños, a través dun acto de entrega de material fitoxenético a produtores que se adhiren ao proxecto e que se levará a cabo ás 13:00 horas no Centro Comarcal de Bergantiños, en Buño.

Un proxecto que pretende recuperar variedades tradicionais de hortalizas así como introducir novos cultivos no noso territorio.

Unindo Galicia e Asturias

O proxecto desenvólvese en varias comarcas de Galicia e de Asturias a través dos GDR que operan en cada unha delas.
Os principais obxectivos son: a posta en valor de terras ociosas; a identificación das producións tradicionais e novos cultivos con potencial; o estudo de posibles vías de comercialización destes cultivos e a creación dunha bolsa de persoas interesadas en incorporarse á actividade agraria.

En fase de execución

Superada xa a fase de asistencia técnica, na que se levaron a cabo as actuacións de posta en marcha do proxecto, comeza este ano a fase de execución na que o primeiro paso é a entrega das sementes dispoñibles para a recuperación de variedades tradicionais e introdución de novos cultivos nos territorios participantes no proxecto.

Neste acto distribuiranse entre os interesados o material do que o GDR Bergantiños dispón actualmente cedido polos centros de investigación agraria galegos que colaboran no proxecto. As sementes que se entregarán son as seguintes: cebola (Vilagarcía), tomate (Negro de Santiago) e tres variedades de pemento (Arnoia, Oimbra e Punxín). Por outra banda, está pendente a recepción de material de variedades locais e outras novas producións de interese (en concreto pataca fina, millo corvo, trigo país, froitos do bosque e algunhas variedades de plantas medicinais).

Novas relacionadas

• 1 ano de GDR e 39 proxectos recibidos.
• Medio Rural une a Costa da Morte e as Rías Baixas Norte.
• Os 2 GAC das Costa unen as súas forzas.

Fonte

• Nota de prensa do GDR de Bergantiños.