Algúns os árbitros da Costa nun Torneo do ano pasado Na segunda xornada da Liga da Costa chega xa o primeiro dos moitos derbis que este ano se vivirán e que darán unha cor especial á competición (por exemplo, na Segunda Galicia coinciden tres equipos malpicáns e na Terceira Galicia catro equipos camariñáns, ademais dos Corme-Ponteceso, Cabana-Nantón...). O primeiro derbi da Liga da Costa disputarase o domingo en Xaviña (Buño) e enfrontará a Cerqueda e Malpica. O encontro será dirixido por Adrián Pérez Rellán, colexiado de Primeira Galicia. Tamén haberá árbitro de Primeira Galicia no derbi da mañá dominical na División de Honra do fútbol veterano que enfrontará nas Redondas a Corcoesto e Cabana, e será neste caso David Vázquez Lema quen dirixa o enfrontamento. Os colexiados de Primeira Galicia da Costa toman o protagonismo do noso fútbol, pois tamén das súas decisións dependerán os destinos de dous equipos costeiros da categoría, Baio e Fisterra. O Baio recibirá ao Piloño, e o encontro estará dirixido por David Castreje, a quen auxiliarán Carlos Señarís e Sebastián Pérez. O Fisterra-Tordoia, pola súa parte, será dirixido por Alberto Baña, con Rubén Reborido e Lucas Vicente nas bandas.

Bruno Méndez estrea temporada no fútbol feminino

O cormelán Bruno Méndez estrea tamén unha nova competición esta temporada, pois na tarde dominical dirixirá o encontro de fútbol feminino que enfrontará na Coruña a Victoria e Atl. Arousana. Unha nova e intensa xornada para os colexiados da Costa da Morte, ás portas xa de que se sumen novas competicións a próxima fin de semana co comezo das ligas de infantís e cadetes. Como cada semana, todas as designacións arbitrais da RFGF, categoría a categoría, en www.futgal.es.

Todos os horarios actualizados en www.futboldacosta.com