Casa das Peritas: "E o barco de pedra flotou"

Maxia no Valadoiro de Mallas — A botadura da barca de pedra no lavadoiro de Mallas foi máxica

Casa das Peritas: "E o barco de pedra flotou"

11:18 19/04/22

Ademais das procesións, a Semana de Fisterra vai tendo xa outra parada obrigatoria. O lugar de Mallas xa é un referente inclasificable da arte contemporánea e da cultura na comarca e no país, gracias ás accións da Casa das Peritas, esa pequena casa de aldea convertida en galería “ocasional” que estas vacacións acollía a exposición “Contexto”.

A artista moldava Natasha Lelenco, a súa impulsora, e o veciño de Sardiñeiro, o mestre/artista polivalente Tomás Lijó, abrían as portas o pasado día 9, e ata este domingo 16 non pararon de recibir visitas e servir vermús Petroni.

Todo, coa intención de convertirse en foco de reflexión entre veciñanza e visitantes sobre “o sentido e da utilidade da arte, das profesións da arte e ao tempo, un exemplo vivo de que todo se pode facer desde o rural, mesmo conseguir que a veciñanza sexa o público prioritario de propostas que con frecuencia adoitan sentirse como lonxanas e inaccesibles”, explícanos Lijó.

E precisamente isoa, a participación das xentes do lugar, visitando a expo e nas intervencións en zonas comúns, foron o máis salientable desta cuarta edición da galería, o que lles dá “gañas de seguir facendo cousas”.

Expo na Casa das Peritas — A Casa das Peritas chea por Semana Santa

Arte e vermu Petroni na Casa das Peritas

A mostra incluíu o traballo in situ da artista polaca Mónika Molenda, escultora que desenvolve a súa actividade profesional como medallista e á que os visitantes puideron coñecer traballando nos baixorelevos sobre xeso a partir dos que logo se elaboran as moedas nalgunha das casas de moeda europeas para as que traballa.

A propia Natasha Lelenco expuso algunhas das súas últimas obras, unha serie de retratos á que denomina “Fetiches” e que, entre o humano e o imaxinario, reflexionan sobre a memoria, o valor da imaxe na construción do recordo e da mirada, e a nosa propia fraxilidade. Algunhas das pezas que puideron verse na exposición viaxan agora a Alemania, rumbo a Nordart, o fesival de arte de Büdelsdorf que se conta entre os máis veteranos de Europa.

Concerto na Casa das Peritas — O dúo ***Lilí Berlín***, formado por Suso Alonso e Blanca Cendán, no concerto da inauguración

Pero se cadra, a acción máis reseñable foi a protagonizada por Francisco Remiseiro. O escultor de Barro, Pontevedra, chegou máis alá do espazo interior da Casa das Peritas, coa instalación do monumental Watching TV, unha peza na que un personaxe sobredimensionado contempla impasible un partido de fútbol na televisión.
A máis emotiva das intervencións tivo lugar no Lavadoiro de Mallas. Coa colaboración do Departamento de Cultura do Concello e co acompañamento musical de Catuxa Salom, Remiseiro fixo flotar unha barca de pedra, causando a sorpresa do público. “Foi un momento case máxico” afirma Tomás Lijó, coorganizador do evento. “Un pode sospeitar polo teorema de arquímedes, que independentemente do seu peso, coas medidas e forma precisa, debería flotar, pero sobrecolle velo en persoa, unha imaxe que, no contexto do lavadoiro de Mallas que lle fixo de marco, e co acompañamento de Catuxa Salom, converteuse nun momento inolvidable.