O Castelao do século XXI expón por primeira vez na Costa da Morte

Malpica Cultura Costa da Morte

O Castelao do século XXI expón por primeira vez na Costa da Morte

10:01 04/02/14

Se non che aparecen unha ducia de viñetas de O Bichero no teu muro de facebook, has de miralo. Sempre ao pé, facendo da retranca arte, Luís Davila pasa por ser un dos mellores debuxantes de viñetas do país. Dende o Faro de Vigo, cada día, enche de risas o mencer de milleiros de galegos.

E chega á Costa da Morte, por primeira vez, e non só para expoñer 60 viñetas publicadas na prensa, se non tamén vén cunha colección pictórica de gran formato, en plan mural, dedicada á muller.

Onte foi inaugurada en Malpica a súa exposición "Entre Liñas", no Centro Cívico malpicán coa presencia do alcalde, Eduardo Parga. O propio Davila tivo tempo par asinar ibros a algún admirador e recibiu a primeira visita en grupo, en concreto do centro Geriatros.

Luis Davila explicou a súa preferencia polos grandes formatos, como queda demostrado coa obra pictórica que presenta en Malpica, e cualificou a colección dedicada á muller como “vitalista” e “colorista”. O artista utiliza pintura acrílica e cores planas que aplica en zonas delimitadas con liñas grosas, coas que vai trazando o debuxo, unha técnica moi semellante, dixo, “á das vidreiras das catedrais”.

No que respecta ás viñetas, Luis Davila reflicte á perfección a idiosincrasia dos galegos, con gran protagonismo para “a xente do agro, do rural, e tamén os mariñeiros”. Tamén entre as 60 viñetas que inclúe a exposición figura un panel dedicado á muller que formou parte dunha proposta arredor do 8 de marzo.