A Agrupación de Voluntarios de Protección Civil de Malpica realizou o ano pasado un total de 166 intervencións, o que supón un incremento do 13,69 % con respecto ao 2012. Xaneiro e xullo foron os meses de máis actividade. Unhas cifras que demostran a gran implicación e o excelente traballo desenvolvido polos 22 voluntarios que conforman a entidade nestes momentos.

O incremento do número de intervencións débese, fundamentalmente, á cobertura de emerxencias, que aumentaron un 28,12 % en relación co ano anterior. Neste apartado, o concelleiro delegado da área, Alfredo Cañizo, subliñou “o papel determinante” dos voluntarios de Protección Civil no rescate do iate Abbie Louise a finais de agosto. O embarrancamento da embarcación na praia saldouse sen vítimas e converteuse case nun espectáculo para os bañistas que ateigaban o areal, pero os voluntarios tiveron que empregarse a fondo para que o suceso non pasase a maiores. Nese sentido, o presidente da agrupación, Iván Muíño, destacou o traballo dos servizos de emerxencias e, dun xeito especial, a colaboración dos surfistas que estaban nese momento na praia.

Moito máis que emerxencias

Pero o traballo de Protección Civil vai moito máis aló da intervención en emerxencias de todo tipo. Iván Muíño destacou que a agrupación tamén “ten moitos operativos organizados non só con entidades e asociacións locais, senón tamén supramunicipais”. Así mesmo, participa en actividades periódicas como festas, actividades escolares, concertos e actuacións culturais ou citas deportivas, encárgase da vixilancia diaria na entrada e saída dos alumnos dos centros escolares do municipio e colabora na vixilancia das praias durante o verán.

Mobilizacións da AVPC de Malpica a petición do CAE 112 Galicia

Novas relacionadas

• A ONG Equus Zebra chega tamén á Malpica para recoller roupa.

Fonte

• Concello de Malpica.