Domingo. 14.07.2024
El tiempo

Emotivo peche á XIX do pioneiro proxecto O Mar na Escola

Fin de curso no Mar a Vela Xogando co vento 2024
Emotivo peche á XIX do pioneiro proxecto O Mar na Escola

O Concello de Muxía acolleu este xoves o acto de clausura da XIX edición do “O Mar Na Escola 2024, Xogando Co Vento”, unha iniciativa liderada pola Escola de Vela Cataventos, e que conta co apoio dos Concellos de Cee, Dumbría, Fisterra, Corcubión, Muxía, Carnota, e da Secretaría Xeral para o Deporte, da Real Federación Galega de Vela, do Club Marítimo Carrumeiro e a empresa Stolt Sea Farm - Prodemar como patrocinador.

Non deixamos de loubar esta iniciativa que permite que o mar si teña o seu espazo nas aulas, e entre os libros de mates e lingua, a rapazada de 13 centros de ensino da Costa da Morte tamén aprenden sobre algo tan propio como o noso mar. A vela e os deportes náuticos son o fío condutor para achegar o mar ao programa educativo oficial permitíndolle a 331 da contorna de aprender cun sabor máis salgado.

Fin de curso no Mar a Vela Xogando co vento 2024 Personalidades

O acto reuniu aos alcaldes e representantes das localidades implicadas: David Costa, Concelleiro de Dumbría: Áurea Domínguez, Alcaldesa de Fisterra; Javier Domínguez Traba, alcalde de de Corcubión; Iago Toba, alcalde de Muxía; Juan Manuel Saborido Rama, alcalde de Carnota; Félix Quintero, presidente do Club Marítimo Carrumeiro; Carlos Pazos, Técnico Deportivo do Concello de Corcubión e Javier De Francisco, Responsable de Relacións Institucionais, en representación da empresa colaboradora Stolt Sea Farm-Prodemar. Non faltaron os alumnos do CEIP Vilarmide, compañeiros do gañador do "VI Concurso de Debuxo da Granxa do Mar Stolt”.

A coordinadora do programa, Noemí Bermúdez de Castro Elorza, explicou que nesta edición participaron 331 alumnos dos seguintes centros: CPR Manuela Rial e CEIP Vila de Cee (Cee); CEIP Santa Eulalia (Dumbría); CEIP Mar de Fora, CEIP Areouta, CPR Nª Sª del Carmen (Fisterra); CEIP Praia de Quenxe (Corcubión), CEIP Virxe da Barca, CEIP Vilarmide, CEIP Os Muiños, IES Ramón Camaño (Muxía); CEIP do Pindo, CEIP de Canota (Carnota).

Ademais de agradecer a implicación das entidades colaboradoras, fixo fincapé no “apoio incondicional” de Stolt Sea Farm. Ademais, agradeceu aos colexios “o esforzo de adaptación a súa programación para integrar esta actividade, que seguro que enriquece a todo o alumnado e dálles unha visión diferente do medio mariño co que viven cada día”. “Trátase de un programa xa consolidado, pero o noso compromiso é seguir avanzando e ampliando cada ano o número de sesións e nenos; contando sempre, como non podía ser doutro xeito, co apoio de todos os presentes neste acto”, explicou.

Concurso de Debuxo

Concurso de Debuxo Stolt Sea Farm-O Mar na Escola 2024-Lucía Senlle Sánchez

No acto fíxose entrega do Premio ao gañador do "VI Concurso de Debuxo da Granxa do Mar Stolt": un lenzo do teu debuxo gañador, un kit de merchandising e unha visita ás instalacións de Stolt Sea Farm - Prodemar, para a gañadora Lucía Senlle Sánchez, e os seus compañeiros de 3º EP do CEIP Vilarmide Eduardo Noya de Muxía.

Máis novas

Comentarios