O grupo ecoloxista PX amósase satisfeito ante a resolución sobre a ubicación do parque eólico muxián
08:43 10/01/11
O grupo ecoloxista PX da Ponte do Porto, amosouse nas últimas horas satisfeito logo de coñecerse a resolución do TSXG, a través da cal se avala a petición de Patrimonio para que varios muíños de vento do proxecto eólico Muxía II, muden a súa ubicación, xa que ían afectar a parte do Camiño entre Fisterra e Muxía.
Os ecoloxistas lembran que nos anos 2008 e 2009 presentaron, xunto con varios veciños de Morquintián, Moraime, e Ozón, varias denuncias ante Patrimonio e Medioambiente por mor deste proxecto eólico, destinado a afectar a parte do Camiño, e a varias zonas de valor ecolóxico e etnográfico.
O colectivo ecoloxista agarda que os novos parques eólicos cumpran co anunciado dende a Xunta, de tal xeito que ningún sexa instalado en Rede Natura e os muíños se ubiquen a non menos de 500 metros do Camiño.
Plan Acuícola
Noutra orde de cousas, o colectivo PX enviou a pasada semana unha carta ao presidente provincial do Partido Popular, Carlos Negreira, na cal lle solicitan ao conservador que “cumpra a súa palabra e elimine do futuro plan acuícola os proxectos de Camelle, Merexo e Seiruga”.
Novas relacionadas
- 07-01-11: O Camiño alonxa os eólicos da zona de Muxía.
- 14-05-09: Os eólicos avanzan cara Muxía coa oposición de Patrimonio e de moitos veciños.
- 26-02-09: ADEGA tamén protesa pola liña de alta tensión dos eólicos de Muxía .
- 23-07-08: PX mostra o seu rexeitamento ao parque eólico de Muxía .
- 24-04-08: A Liña de Alta Tensión para os eólicos de Muxía, a exame .
Fonte
- Redacción de Fran Lago para QPC e radiONeria.
- Nota de prensa do PX.