A Asociación Cultural Nosa Señora do Faro vén de emitir un comunicado no que solicitan, como o Fuso da Moura, a adhesión das 9 mámoas do monte Faro no Parque do Megalitismo que proxecta a Deputación da Coruña.

Lembran que “na parroquia de Brantuas se encontra a máis grande concentración de mámoas da volta”. Son nove mámoas que se localizan na ladeira do monte Faro e das que xa falou Eduardo Pondal nun artigo na prensa de Santiago no século XIX. Máis concretamente sitúanse ás beiras do camiño real que comunicaba Brantuas e Niñóns con Corme.

Sinalan que ademais no lugar hai un petróglifo, dúas coviñas e todo a mitoloxía relacionada co monte e coa romaría do Faro (ermida, fonte, camiño da procesión, pedra de abalar, cruceiros e cruces de pedra) así como a súa relación co mundo do mar ou o valor xeolóxico.

”Esta inclusión sería unha grande achega ó Parque de Megalitismo tanto pola cantidade de mámoas que conforman este conxunto como pola súa excelente situación xeográfica nun dos máis importantes miradoiros da Costa da Morte desde onde se divisa toda a comarca de Bergantiños e outras limítrofes”, explican.

Para intentalo, organizan unha mesa de traballo na que se redactará un proxecto para realizar unha ruta arqueolóxica e cultural que leve a visitantes a todos estes elementos de interese. Unha vez estea redactada a ruta, entregarase nas administracións correspondentes para a súa factible execución.

Novas relacionadas

• Novembro 21: Coristanco súmase ao Parque do Megalitismo co dolmen de Chan das Embarradas.
• Maio 21: O Parque do Megalitismo avanza coa organización dunhas xornadas e o acordo para sinalizar os 17 momumentos.
• 12-04-21: A Deputación e 10 concellos intentan o impulso definitivo ao Parque do Megalitismo da Costa da Morte tras 20 anos de promesas.
• Decembro 20: A pandemia tamén provocou o eterno retraso do Parque do Megalitismo.
• Novembro 2018: O Parque do Megalitismo dá pasos concretos.
• Marzo 2018: A Deputación recupera do caixón do esquecemento o Parque do Megalitismo da Costa da Morte:
• 2014: O Parque do Megalitismo da Costa da Morte, 13 anos de quimera.
• Outubro 2011: Pasiño a pasiño co Parque do Megalitismo.
• Xullo 2008: Un paso máis cara a aprobación final do Parque Arqueolóxico do Megalitismo da Costa da Morte.