#8M: Vimianzo presenta unha ruta que homenaxea a muller vimiancesa

07:45 06/03/23

O Concello de Vimianzo prepara unha homenaxe á muller vimiancesa co gallo do vindeiro 8 de marzo, Día Internacional da Muller, e que continuará poñendo en relevancia a importancia da loita contra a violencia de xénero.

En primeiro lugar, o goberno local levará ao Pleno extraordinario do vindeiro mércores, 8 de marzo, a proposta para o cambio de denominación do miradoiro situado na rúa da Torre como Miradoiro 8M, así como o nomeamento da praza ubicada no mesmo lugar como praza Ramón Berrra Pereira.
Posteriormente, ás 10:30 horas, procederase á inauguración do Roteiro 8M, un percorrido urbano e reivindicativo duns seis quilómetros polo Val de Vimianzo. Constará de oito paradas temáticas a través das que se fará visible a figura da muller en diferentes eidos e aspectos da vida.

A través de varios formatos, as voces das máis das cen mulleres que participan nos talleres ACTÍVATE organizados polo Concello de Vimianzo en diversas parroquias, e impartidos polo psicólogo Sergio Trillo, narrarán as súas experiencias para mostrar ao mundo o duro pasado que viviron.
A presentación deste roteiro terá lugar ás 10.30 horas no mirador da Torre, contando coa actuación especial da cantante Irma Macías e do grupo de teatro Tete, que intervirá na parada establecida no Castelo.

A concelleira de Igualdade, María José Pose, sinala que esta iniciativa “será unha forma moi dinámica e singular de mostrar o pasado de todas aquelas mulleres que sempre loitaron, desde ben pequenas, por sobrevivir en tempos moi duros e por sacar adiante a toda a súa familia”.
“É realmente importante darse conta de cada pequeno xesto que fixeron as nosas nais, avoas, tías ou irmás porque grazas ao seu tesón, esforzo e mesmo sufrimento, hoxe podemos vivir mellor e con máis futuro”, engade a alcaldesa, Mónica Rodríguez.
Por outra banda, continuarán durante os próximos días actividades a favor da igualdade e contra a violencia de xénero nos centros educativos.