Fin de semana cheo de actividade no concello de Vimianzo
08:32 19/04/13
O concello de Vimianzo ten por diante unha fin de semana chea de actividades para todos os públicos e para todos os gustos, tanto culturais coma deportivas.
Comeza o sábado coa primeira das Andainas Coñece a Costa da Morte organizadas polos concellos de Camariñas, Corcubión, Muxía, Ponteceso e Vimianzo. O anfitrión deste sábado é o concello de Ponteceso, cunha ruta que saíra da Praza do Recheo ás 10 da mañá collendo o camiño ata Corme pola ribeira do Anllóns e as praias da Barra e Valarés. Un grupo de 55 persoas sairá da Praza do Concello de Vimianzo ás 9.15 da mañá para participar nesta primeira andaina e regresarán a Vimianzo arredor das 2 da tarde.
Os máis pequenos tamén teñen actividades pola tarde dentro da programación de animación á lectura da biblioteca municipal. Ás 6 da tarde o polifacético Pedro Brandariz, presentará o espectáculo Contos e outras andrómenas que ben seguro encherá a biblioteca coas gargalladas dos presentes.
Ás 8 da tarde, a Sala de Exposicións Antón Mouzo inaugura unha nova exposición de pintura da vimiancesa Chelo Lema Varela, Sentires de sentimentos no tempo, que ten a oportunidade de expoñer por vez primeira na súa terra natal.
O domingo o teatro volverá ser o protagonista do Auditorio da Casa da Cultura no mes da República da liberdade, coa Compañía Teatro do Morcego que poñerá en escena Os patios da memoria.
