A Casa da Cultural de Vimianzo acolle estes venres e sábado o II Foro de Liderado Feminino no Rural da Costa da Morte “Alza Voz de Muller”; unha cita xa consolidada como un espazo para a reflexión, o intercambio de experiencias e o impulso do talento feminino.

O foro arrincou cunha sesión inaugural na que interviron Mónica Rodríguez, Alcaldesa de Vimianzo; Julio E. Abalde, Subdelegado do Goberno na Coruña; María Quintiana Pérez, Directora Xeral de Promoción da Igualdade da Xunta de Galicia; Rosa Ana García, Deputada Provincial da Deputación da Coruña; e Lorena Añón, Vicerreitora de Estudantado, Igualdade, Diversidade e Benestar da USC.  Todos destacaron a importancia de crear e fortalecer espazos de encontro como este que contribúan a visibilizar o papel das mulleres no desenvolvemento do rural e a fomentar novas oportunidades de liderado.

Na súa intervención, a Alcaldesa Mónica Rodríguez destacou a importancia que ten para un Concello como o de Vimianzo organizar este tipo de encontros. “Vimianzo é un territorio con carácter e con identidade e non é casualidade que Alza Voz de Muller se celebre no noso municipio”, resaltou.

“Este encontro representa unha oportunidade para visibilizar o papel  esencial das mulleres no desenvolvemento do rural galego e para seguir  avanzando cara a unha sociedade máis igualitaria e con máis  oportunidades”, sinalou o sudelegado do goberno Julio Abalde durante a súa intervención.

Pola súa banda, Rosa Ana García agradeceu ao Concello de Vimianzo e á súa alcaldesa o impulso deste foro, “un espazo necesario para poñer o foco onde tantas veces non se pon: nas voces das mulleres que durante demasiado tempo tiveron que abrirse camiño con máis esforzo, máis obstáculos e menos recoñecemento”.
A deputada subliñou que o rural “é un territorio de futuro” grazas ao traballo de mulleres emprendedoras, profesionais, autónomas, empresarias, traballadoras, responsables públicas, representantes de asociacións e creadoras de proxectos. “Temos talento, capacidade, liderado e vontade de transformar a realidade”, afirmou.

Baixo o lema “Da consciencia á acción”, esta primeira xornada estivo marcada polas diferentes poñencias de contidos inspiradores e de alto valor práctico.

Sábado, 9 de maio

O II Foro Alza Voz de Muller continúa mañá sábado durante todo día cunha intensa programación que incluirá relatorios, talleres e espazos de networking, coa participación de destacadas profesionais do ámbito da comunicación, o emprendemento entre as que están  Gemma Fillol e Nuria Robleño.

A continuación detallamos o programa de mañá sábado:

• 9:45h: Apertura de portas e acreditación
• 10:00h: Mesa de diálogo “Facer política sendo Muller: poder, exposicióin e responsabilidade”.
  • Belén do Campo. Delegada provincial da Xunta de Galicia.
  • Patricia Iglesias. Parlamentaria do Grupo Socialista en Galicia.
  • Mercedes Queixas. Deputada do Parlamento de Galicia polo BNG.
• 11:00h: Poñencia “Non é casual o poder do ritual: o poder dos rituais nun mundo que nos quere esgotadas”. Gemma Fillol
• 12:00 h: Pausa café
• 12:30 h: Poñencia “Se non te ven, non existes: visibilidade, marca persoal e exposición dixital”. Nuria Robleño
• 13:30 h: Almorzo
• 15:30h: Mesa de diálogo “O sistema non é neutro: barreiras invisibles no emprendemento e no emprego”.
  • Eva López Barrio. Responsable do Programa Woman Emprende
  • Rosa Arcos. Promotora e socia fundadora de FADEMUR
  • Patricia Vilán. Secretaria Xeral da FEGAMP
• 16:30h: Obradoiros experienciais
  • Da idea á acción: empezar sen permiso. Liderado por Nuria Robleño.
  • Sosterse sen romper: Sostibilidade, cartos e enerxía. Liderado por Gemma Fillol
  • Liderar a túa carreira: decisión, límites e poder persoal. Liderado por Eva López
• 18:00h: Dinámica participativa de peche: “E agora que? Redes, alianzas e futuro compartido”
  • Manuela Gómez. Representante de Executivas de Galicia
  • Rosa Arcos. Representante de FADEMUR
  • Eva López Barrio. Responsable de Woman Emprende
  • Beatriz Gallart. Representante de Todas Nós
• 19:00h: Peche institucional

Máis novas