O fraude forestal do Caso Maceiras segue medrando

Vimianzo Costa da Morte

08:55 29/07/13

parcela forestal en Santa Comba afectada polo Caso Maceiras

Xa son 26os imputados no "Caso Maceiras". A pasada semana o xuíz de Corcubión imputaba a 6 novos funcionarios do Distrito Forestal V de Vimianzo. Ao parecer estes ocuparíanse de tramitar as axudas e de asinar as inspeccións fraudulentas, chegando a superar un montante de 2 millóns de euros.

Estas detencións son ben acollidas pola FRUGA, que leva máis dun ano en loita por este fraude. Así e todo, dende a Federación Rural Galega consideran que é necesario a implicación de máis representantes das entidades públicas, pois entenden que non se puido levar a cabo unha trama tal sen a connivencia e participación de membros da Consellería de Medio Rural e Mar.

Esixencias no Parlamento

Mentres o grupo de Alternativa Galega de Esquerda (AGE), a través do seu deputado Antón Sánchez, vén de esixir á Xunta toda a información e contratos coa Administración pública das empresas Maceiras e Esmorís, implicadas na trama fraudulenta de reforestación da Costa da Morte. “Queremos coñecer con exactitude a dimensión económica destes acordos”, indica Sánchez, quen presentou no Parlamento a petición de documentos mediante o artigo 9 do regulamento da Cámara.

Para Antón Sánchez, a trama forestal con epicentro en Vimianzo –da que hoxe se coñecían seis funcionarios imputados máis- revela, polo menos, ausencia de control da Consellaría de Medio Rural. “Por non falarmos de complicidade. En todo caso, a Xunta non cumpriu as súas funcións e agora agóchase nunha actitude pasiva”, sinala o parlamentario de Alternativa. Segundo AGE, só as reivindicacións dos afectados –ate o o momento, uns 300 coñecidos- obrigaron á Xunta a se mover. “Porque o Goberno do señor Núñez sempre amosou máis intencións de ocultar que de esclarecer”, conclúe Sánchez.