Acordo unha segunda cita ás portas do remozado campo de fútbol do Buño SCD, Xaviña. A véspera, na mesma mesa onde amasa pan á vella usanza, José Luis Calvo “Morilla” estricou os seus recordos. Fotos, recortes de prensa do “Riazor” e “EL Ideal Gallego” así como un vizoso anecdotario, ían das mans á boca deste ex xogador nos anos 60 do Ponteceso SD. Espile datos e nomes, rememora aliñacións e sucedidos atropeladamente, pois córrelle tanto a lingua como a cabeciña. Diante dalguha das instantáneas pingadas de fariña, a emoción e o tempo transcurrido, faino dubidar no dato preciso. “Si oh, este é David Vidal e este, sabes quen é este? Luís Suárez, daquela no Inter de Milán, cando xoguei con el na inauguración en 1969 do campo municipal de Ponteceso contr o RCDeportivo!” Si? E que tal? “Dicíame, siete, menos toque e máis correr, que aquí la técnica ya la pongo yo”.

Mais iso foi onte, depois de pasar polo arquivo personal dun pai e fillo volcados no club local, Emilio Calvo e Emi. O proxenitor, ex xogador do Ponteceso SD e do Buño SCD, directivo e adestrador das categorías inferiores e dun equipo feminino local, posúe un amplo fondo documental que ben podería rematar nun fermoso libro sobre o Buño SCD. Ao seu carón, un lanzal mozo, o mesmo que leva 22 anos distribuindo xogo no centro do campo do club oleiro, escoita respectuosamente tanta vida ida.

Mais o dito, foi onte. Este serán de partido dominical, mentres os xogadores do Esteirana e Buño quentan ás ordes do incombustible Esmorís, outro referente no fútbol da Costa da Morte nos oitenta, Morilla e máis eu adentrámos nas taquillas. Un humilde salón de trofeos inzada de copas, obxectos de feitura oleira, bandeiríns e imaxes e que unha matrícula anuncia no frontispicio do campo. Foto a foto, comentando quen era quen, xurdiron as lagoas propias da memoria. O tempo traballa. Meu informante entra e sae á luz morna da tarde e volve cun gol do Buño. Nalgún intre da recollida informativa, alí se xuntaron xogadores da fornada actual, outros de décadas atrás como Arturo Novo, mesmo “Cachiño”, hoxe directivo e nos anos 50 cancerbeiro do Esteiro FC.

E foron caendo os minutos, os relatos adheridos ás imaxes sepia e os goles do partido entre a algarabía dos seareiros nas bancadas. Escoitei a Morilla e ós demáis. Escoitei o balbordo provinte dos amoreados na cantina. E escoitei o golpear do balón, o alento do esforzado lateral, o pitido do colexiado… para logo verquer tal mexunxe de vida na ola que o deixará fermentar…

• Hector Pose ([email protected]).

Artigos do Mar de Paixón

• Un Mar de Paixón: Un proxecto…, xa traxecto.

Novas relacionadas

• O fútbol na Costa da Morte, un mar de paixón.
• A historia da SCD Malpica nun libro .

Máis información

• www.futboldacosta.com.
• Cadros da Copa da Costa 2012 de maiores e xuvenís.

Crónicas da semana

• Fases Xuvenís: Todo para o final.
• Copa da Costa: Xornada sen tensión.
• 3ª Autonómica: Carnota e Outes certifican o ascenso e segue a loita pola 6ª praza.
• 2ª Autonómica e Copa: Unha Copa que manipula unha Liga aínda viva.
• Preferente: Coa salvación na man.
• 1ª Autonómica: O Ponteceso rubrica a permanencia.
• Resultados dunha fin de semana intensa de #futboldacosta.

Máis novas

• Xogando aos médicos co #fútboldacosta.
• QPC MOTOR: Ralli de Noia: As Carreiras son así.
• Un Mar de Paixón: Un proxecto…, xa traxecto.
• Alberto Pose: Unha por toda a familia futboleira da Serra de Outes.
• A Federación decide os ascensos e a Asociación de Clubes dá novos pasos.

Fonte

• Redacción de Deportes de QPC ([email protected]).