#SoandoconForza: Cuestionario co músico e escritor carballés Lou

DOS banda carballo — Lou, á esquerda, xunto a Álex Barbosa, son DOS

#SoandoconForza: Cuestionario co músico e escritor carballés Lou

15:37 01/04/22

Con motivo do primeiro concerto oficial de “DOS”, o novo proxecto do músico e escritor carballés Lou7Go xunto con Alex Barbosa, este sábado 2 de abril na sala A Reserva de Carballo, convidamos a Lou7Go a facer o cuestionario musical de #SoandoconForza.

Como xorde este novo proxecto “DOS”?

Meu pai púxolle unha pequena semente á miña nai e... en serio, do xeito máis sinxelo, (aparentemente claro) puxen un anuncio en Facebook e Alex Barbosa, que é o guitarrista e director musical do proxecto, envioume unha mensaxe, quedamos, tocamos, comprobamos que temos moita química, e aquí estamos.

En cantos grupos estivo Lou7Go ó longo da súa carreira musical?

Dígochos por orde: The Mentes, + Que Perros, KM0 (a partir de aquí pérdome coa orde), Achafemia, Charcos y Narcos, La Banda del tío vivo, La puerta número 2, e algúns máis que francamente agora non lembro.

Portada de Relaciones de Amor primeiro disco de Lou7Go — Portada de "Relaciones de Amor", primeiro disco de Lou7Go

Algunha fórmula para que cada concerto sexa especial e tocar non se convirta en algo monótono?

A verdade é que non, o único que che podo dicir a día de hoxe é: traballa moito os temas e o teu propio instrumento de forma seria, e despois divírtete nos concertos, non esquezamos que a vida é un xogo, serio, pero un xogo.

Con que grupo vos gustaría tocar ou telonear?

Os Rolling Stones.

O concerto ao que asistises que máis che impactou ou te marcou?

Non vou a moitos concertos, sei que soa raro, pero é así. Impresionáronme bastante algúns que vin aquí en Carballo, son de Vigo e chámanse Cro!.

Sala de concertos ou lugar onde máis che gustou tocar?

Non me lembro, falo en serio.

O grupo que máis te decepcionou en directo?.

Aínda que o soubera, non cho diría.

Algún concerto do que gardes bo recordo como músico ou espectador na Costa da Morte?

Cro, en Carballo.

Tres garitos de rock and roll que recomendarías?

Ningún, penso que os garitos da noite son antros de destrución do ser humano, prefiro un lugar bonito para almorzar como o Colón, en Carballo ou o Dubra.

Algunha cancelación dolorosa?, algún concerto no que non poideses tocar por calquera motivo?

Non gardo ese recordo.

Están o pop e o rock en horas tan baixas como parece ou ainda teñen acordes para rato?

Non vexo a música dende ese punto de vista, se algo che gusta consúmeo, e buscas en calquera sitio, e se non, créao ti mesmo. Non me preocupan os procesos polos que pasan os estilos musicais porque creo que é algo natural, unha expresión da maioría da sociedade, se a sociedade está enferma, a música tamén o estará, así que só me preocupo, a nivel individual, por consumir. e facer cousas que dende o meu punto de vista son boas, aínda que para outro poden ser unha merda. É como a comida, podes comer comida de porcallada ou comida de calidade, e se a comida de calidade escasea, podes plantar ti. Así que, respondendo á túa pregunta, diríache que sí "cada vez hai máis comida de porcallada".

Que anda Lou7Go escoitando ultimamente?

Jazz latino, música antiga, espiritual, clásica, Julio Iglesias, boleros, blues e por suposto, Dos.

Algunha recomendación musical? algunha banda nova que penses que teña bastante calidade e merezca a pena pararse con ela?

Son un ignorante á hora de lembrar nomes, escoito, pero non fago caso de como se chama a xente, non sei... é coma se para min todos os músicos formaran parte de un só, e eu escoito fragmentos dese músico universal repartido en todos os artistas do universo sen prestar atención ós seus nomes. Pode soar egoísta ou pretencioso, pero estou aprendendo a que me importe un carallo o que pensen os demais. Iso, ou teño unha memoria de merda e cústame responder a esta pregunta, por iso a levo a un lugar máis místico.

Que grupo de pop rock non entendes que teña tanto éxito?

Para min todo ten sentido, aínda que sexa difícil de ver. Aínda así, é unha pregunta complicada porque, que é o éxito? O único que che podo dicir é que eu me alegro por calquera que se gaña a vida como lle sae da cona e teña todo o éxito que el ou ela crea que ten.

Tres festivais que che gusten, ou tres festivais que recomendes.

Non vou a festivais, bótanme para atrás as aglomeracións borrachas de xente, porque sempre teño que acabar eu bébedo tamén para camuflarme no ambiente, e eso é algo que non me beneficia.