Xoves. 08.12.2022
El tiempo

A 9ª edición do Mes da Fundación botou o peche en forma de teatro

Teatro da Farándula Velutina A derradeira bala
"A derradeira bala", de Farándula Velutina, pechou o ciclo
A 9ª edición do Mes da Fundación botou o peche en forma de teatro

Ven de rematar a pasada semana a 9ª Edición do programa “O Mes da Fundación”, organizado pola Fundación Fernando Blanco de Cee. Unha cita que serve dende o ano 2013 para conmemorar dous relevantes acontecementos históricos da vila da Xunqueira acontecinos neste outonal mes (o nacemento do fundador o 18 de outubro de 1796, e a inauguración do Instituto que leva o seu nome, o 2 de outubro de 1886). Pero que tamén serve para encher de cousas interesantes o Auditorio Baldomero Cores.

Un programa que consta ademais de dúas liñas paralelas, unha centrada nos centros de ensino da vila da Xunqueira, e outra que achega actuacións ao públixo xeral.

A sección destinada aos centros educativos do concello pechouse o pasado xoves 27 con tres obradoiros impartidos polo entomólogo Miguel Santamaría Cabezas e ao que asistiron o alumnado de 3º de Primaria do CEIP Eugenio López e do CPR Manuela Rial. Estiveron os talleres centrados nos artrópodos (insectos, arácnidos, bolboretas e miriápodos), e @s asistentes, aínda que entraban con certo “medo e reticencia”, acabaron entusiasmados tocando e acariciando aos insectos pao, insectos folla, escaravellos, bolboretas, tarántulas, .... Ademais de coñecer as características de cada un deles, o seu entorno de vida, Miguel Santamaría soubo transmitirlles a vital importancia que estes animais teñen para o futuro do planeta.

A sección para o público en xeral rematou o sábado 29 coa compañía teatral Farándula Velutina, a cal representou “A derradeira Bala”. Farándula Velutina é un grupo de teatro afeccionado nacido no verán do ano 2018, vinculado á Asociación Cultural As Nove Musas de Corcubión, co obxectivo de crear un espazo de creación escénica de espectáculos para todo tipo de público.
A compañía está integrada por antigos membros da agrupación de teatro escolar Tuéjele do IES Fernando Blanco. A pesares da súa curta vida, Farándula Velutina participou xa en moitos certames e festivais de teatro, contando con numerosos recoñecementos e premios polo seu bo facer enriba do escenario. “A derradeira bala” é a historia de Luciana Cardone, a cal decide abandonar as trincheiras para ir na busca doutro mundo cheo de poesía, de teatro, de música ..., pero descuberta e xulgada polos seus superiores, é condenada a morte. Mais o amor pola música de Luciana, e as súas ansias de liberdade, farán que a cousa se complique polo camiño.
“A derradeira bala” está inspirada no libro do mesmo título do profesor do IES Fernando Blanco, Fernando Castro Paredes, autor de varios poemarios e pezas teatrais, polas que tamén leva recibido numerosos galardóns coma o Premio Varela Buxán, o Rafael Dieste ou o Premio do 2º Certame de Nova Dramaturxia Actual, entre outros.

AGRADECEMENTOS Para poder levar un programa cargado de actividades, tanto para os centros educativos como para o público en xeral, fai falta ilusión e traballo a partes iguais, pero tamén son imprescindibles os apoios e as colaboracións, sen as cales, nada disto sería posible. Polo tanto, non podemos, nin debemos esquecernos, dos que nos botaron unha man. Agradecer á Deputación Provincial da Coruña, ao Concello de Cee, a Rede de Patrocinadores da Fundación, a Xeal e a Consellería de Cultura, Educación Formación Profesional e Universidades, o seu apoio nos distintos ámbitos de traballo da entidade. Aos centros educativos do concello e ao público en xeral a asistencia ás distintas actividades propostas. Aos convidados por aceptalo noso convite e encher a nosa vila de cultura durante todo o presente mes. E por suposto ao Técnico de Cultura do Concello de Cee, Víctor Castiñeira, pola amizade, impagable axuda, e infinita paciencia.

O programa do Mes da Fundación.

comentarios