Carnota e Cee renderon homenaxe aos 280 xornalistas asasinados en Gaza
Unha semana máis, a sociedade da Costa da Morte saíu á rúa para expresar a súa condena pao xenocidio palestino. As vilas de Carnota e Cee acolleron sendos eventos solidarios e reindicativos, para facer verlle ás nosas administracións o sentir popular perando a masacre que perpetúa o goberno sionista israelí sobre Gaza e os territorios ocupados de Cisjordarnia.
En Carnota foi o pasado mércores cando numerosas familias se xuntaron noutra nova cacerolada poética por Palestina, para dar conta de que a palabra tamén resoa.
Xa onte, xoves 18 de setembro, o Colectivo de Apoio a Palestina COAP Costa da Morte organizaba un evento para render homenaxe aos arredor de 280 xornalistas asasinados en Gaza os 23 meses de operacións militares de Israel no enclave palestino. A Praza 8 de Marzo de Cee vestiuse cun mural, “Voces de Gaza”, feito con imaxes de cada un deles, e as mulleres do colectivo foron nomeando un a un, os 280 nomes.
”Se o Exército israelí segue a matar xornalistas en Gaza a este ritmo, pronto non quedará ninguén para nos informar”, denunciaron, destacando a iniciativa global promovida por Reporteiros Sen Fronteiras, asinada por máis de 200 medios e organizacións, na que pide a protección dos profesionais dos medios palestinos, así como o acceso independente da prensa internacional a este territorio, que ata o de agora vén sendo denegado polas autoridades israelitas.
E para rematar leron un texto de Nour Al-Saqa, unha moza gazatí desprazada de 25 anos, traballadora de Medico Sen Fronteiras na Franxa: “A vida en Gaza ensínache moitas cousas. Durante moito tempo quixen irme, mais agora sinto que non podería aturar vivir en ningún outro lugar do mundo. Gaza paréceme o único lugar real que queda na Terra. Non sintan mágoa por nós. Sintan mágoa por vostedes mesmas, por vivir en países que arman a Israel, que envían armas para matar as crianzas. As súas bombas están a matar crianzas e, se iso lles molesta, entón non sintan mágoa poor nós, sintan mágoa por vosotedes mesmas, por non ter a suficiente influencia no seu propio país para detelo”.
