Un congreso internacional para Bergantiños

08:41 02/12/14

Estase a convertir Carballo na capital tecnolóxica do país. Non hai moito acollia o Congreso cos Pés na Terra, que servía para dar conta, a pesar da non presencia dos que poñen os cartos, do nivel tecnolóxico que teñen varias empresas da Costa da Morte.

E estaremos atentos, porque o TEDxGalicia, un evento internacional, terá lugar en Carballo o venres 23 de xaneiro de 2015, en xornada de tarde de 16:00h a 20:00h aproximadamente.

E parece que haberá que anuncialo ben, porque é un acontecimento único. Falamos dun evento anual onde algúns dos pensadores e emprendedores máis importantes do mundo están convidados a compartir o que máis lles apaixona. “TED” significa Tecnoloxía, Entretemento e Deseño - tres grandes áreas que en conxunto están dando forma ao noso futuro. De feito, o evento dá cabida a unha temática máis ampla, mostrando “ideas que merecen a pena” de calquera outra disciplina.

Levan dende o 2010 levando grandes persoeiros por pequenos concellos de Galicia. Nomes como o Mago Román García, Frankie Gómez, Manolo Castro, Xurxo Mariño, Manolo Gago ou o mesmo Jorge Mira xa teñen pisado o escenario do Tedx, como vemos aquí:

Este ano a organización escolle Carballo para levalo adiante, pero coma sempre, e como cada ano, abren o proceso de inscrición sen confirmar ponentes. Estaremos atentos porque os nomes seguro que son de verdadeira incidencia.

Ademais, prometen unha proposta especial, o TEDxGaliciaU, un espazo previo ao TEDxGalicia formado por charlas curtas das e dos asistentes.

Polo de pronto, xa vos podedes ir inscribindo por 25€ coas 100 primeiras entradas anticipadas.