3ª Autonómica: Vanse clarexando as cousas

13:42 15/04/13

Escena do Porteño-IDC - Foto-Ligadacosta

Van esclarecéndose as cousas por arriba na 3ª Autonómica a falta de 4 partidos para o remate da Liga regular. Por arriba, seguen as dúas loitas máis fermosas que nunca. O título segue en mans dun Independiente que salvou un dos partidos máis difíciles, o do Porteño na Grixa, que deixa aos carballeses líderes, xa só con 2 puntos sobre o Camelle (que superaba ao Ameixenda e segue nunha boa liña) e con 4 sobre o Porteño. Precisamente, a loita por esa 2ª praza será aínda máis dura, pois o cambio do ascenso directo á xogar a promoción é moi grande.

E na promoción, o Soneira B xa está matematicamente e o Cerqueda xa ten un pé posto trala vitoria ante o Alcaián. Un Cerqueda que leva nas últimas semanas vencendo a trancas e barrancas pero que matén unha privilexiada 5ª praza con 8 puntos xa sobre o Ameixenda, que ademais ten un partido máis. Así, parece que o Laxe o é que mellor chega a este treito final de competición. Vén de colocarse 6º, ten un partido menos que o Ameixenda, ten que sumar os 3 puntos do filial fisterrán e, o máis importante, chega con forzas e ilusión. Ten agora 2 puntos máis que o Laxe, e 5 sobre Nantón, Lira e Baíñas, que parece que quedan algo descolgados, pero aínda manteñen algunha opción.

Por certo, na promoción as tarxetas amarelas acumuladas durante a Liga non contan (si contan se sumas a 5ª na última xornada) así que vaian aguantando.

Porteño - Indep. Carballo (1-1)

PORTEÑO: Pablo, Maikol, Sestayo, Óscar, Pejo, Ismael, Mario Toja, Gabi (Brais, min.55), David Toja, Cousillas (Búa, min.65), Yuyo.

O 11 do Independiente de Carballo na Grixa-Foto-Ligadacosta

IDC: Noé, Castro (Jonathan, min.50), Seo, Scott, Belar, Carlos, Cholo, Mario, Velo (Jorge, min.48), Benítez, Juni.
Goles: 1-0, min.60: David Toja tras revolverse dentro da área e a trompicóns; 1-1, min.63: Mario tra unha gran xogada individual.
Lesión: o local Gabi.

Gran ambiente na Grixa con máis de 200 afeccionados para ver un dos mellores partidos que se poden ver da 3ª da Costa. E superou o IDC, non sen apuros, a proba de lume, que o mantén no máis alto da táboa. Foi un partido moi intenso, con moito ritmo, pero con dous equipos con medo a xogar a trás, e moito balón longo buscando as segundas xogadas. O Porteño levou o peso, metendo atrás aos carballeses con boas ocasións para Cousillas, que mandou ao pao, unha Yuyo que parou o meta visitante, e Gabi, que tivo a máis clara cun chut que se paseou pola liña de gol e acabou sacando un defensa. Na segunda, igualous emáis o choque, cun Independiente que se viu algo arriba. Aínda así, Mario Toja adiantaría aos locais, pero de contado, Mario inventaría un golazo para facer as táboas. Yuyo e Brais puideron meter por diante de novo aos da Ponte, que mesmo fallarían un penalti no minuto 85 por medio de Mario Toja. Ao final, aínda tivo o cadro carballés arrestos para facer perigo pero Cholo fallou a última ocasión tras un pase de Mario na que os visitantes pediron penaltis. O único detalle para esquecer, un botellazo que lle caeu preto ao porteiro do IDC, segundo nos contan, chegado da afección do Camelle.

Baíñas - Castrelo (4-1)

BAÍÑAS: Damián, Simón (Sancho, min.70), Samuel, Luís, Héctor (Suso, min.80), Styven (Diego, min.60), Iván, Mario (Esteban, min.50), Cris, Fernando (Adrián, min.85), Taski.
CASTRELO: Iván, Manolo, Mario, César (Edreira, min.55), Gus (Kevin, min.70), Litos, Esteban, Sergio, Felipe, Germán, Sergio Vilaseco.
Goles: 1-0, min.25: Styven tras un erro do porteiro; 2-0, min.40: Cristian; 3-0, min.65: Cristian; 3-1, min.72: Edreira; 4-1, min.89: Diego.

Partido para disfrute das tan grandes coma novas afeccións do Baíñas e Castrelo. Foi un resultado enganoso que mantivo a tensión boa parte do encontro, sempre con deportividade, e sobre todo, cun gran ambiente nas bancadas, onde os preto de 200 siareiros que enchían o Municipal cas cores branquiazuis e verdeamarelo disfrutaron deste derbi vimiancés. Cómpre destacar que sempre haia máis xente vendo a estes equipos de 3ª no Municipal que os partidos de Preferente. En todo caso, o Baíñas adiantábse cun gol de Stuven que aproveitaba un balón que deixaba morto Iván tras errar na blocaxe. Cristian metía o 2-0 antes do descanso malia que o partido non era tan claro para os verdes, tendo ocasións os dous equipos. De feito, Germán tiro ao longueiro, e Litos lanzaba preto unha falta dentro da área. Tamén Sergio de Vilaseco tivo unha ao comezo da segunda, pero Damián, que o coñece de sobre tras levar media vida xogando xuntos, desbarataba a ocasión. Cristian sentenciaba aos 20 da segunda, pero Edreira aínda deixaba algo de emoción no partido, un partido que pecharía Diego aproveitando o baixón físico dos branquiazuis.

Nantón - Lira (3-0)

NANTÓN: Bonano, David, Eloy, Félix, Diego, Carlos Vidal, Fabio, Amado, Luís, Martín, Iván. Tamén xogaron Dani, Cachi e Rubén.
LIRA: Andrés, Javier de Milucha, Pelexo (Isma), Fran de Muros, Santi, Germán (Mauro), Cristian, Michelón (Iago), Demetrio, Fran Perico, Oliver (Saúl).
Goles: 1-0, min.50: Luís tras un rexeite do porteiro; 2-0, min.86: Luís; 3-0, min.89: Luís.
Lesións: Michelón e Pelexo.

Sigue o Nantón coa súa boa xeira de resultados, i e que este é o 9º partido consecutivo sen perder do equipo cabanés. Pero un resultado algo enganoso, con dous regalos lirachos á volta do descanso que Luís non desaproveitou, mesmo sen ángulo ou sen mirar. A primeira parte tivo moi pouca historia, con dous equipos máis preocupados por non encaixar gol que por levar perigo á porta rival. Ningún dos dous porteiros tivo traballo, pero sempre co Lira con máis presencia en campo contrario. Na segunda parte o equipo local foi a polos tres puntos. No 47 Iván remata mal un centro de Luís con toda a portería para el. No minuto 50 Luís acada o 1-0 tras un pase en profundidade ás costas da defensa. O balón recólleo Luís tras fallar o porteiro rival o despexe e marca a porta vacía, aínda que un pouco escorado á dereita. No minuto 69 Luís volve a levar perigo á porta do Lira cun disparo que atalla ben o porteiro. No 85 outra vez Luís, remata fóra dende o mesmo lugar onde acadara o primeiro gol. No minuto 86 é de novo Luís o que pon o 2-0 no marcador despois de regatear ó porteiro tras un bo pase de Martín. No 89 Carlos recupera o balón e ve o desmarque de Luís, que recibe na liña de medios, conduce o balón nunha rápida carreira ante a oposición dun defensa que non é capaz de frenalo, e ante a saída do meta crúzalle o balón, que tras dar no pau entra para facer o definitivo 3-0. As claves do partido foron a eficacia goleadora de Luís e o traballo inconmensurable de Félix que se fixo o dono do medio campo.

Coristanco - Muxía (1-1)

CORISTANCO: Brais, Rubén, Jonathan, Juan (Magovi, min.60), Javi, Torreira (Alexis, min.30), Iván, Adrián, Navarro, Cancela, Gonzalo.
MUXÍA: Ángel Luís, Luís Romaní, Martín, Ángel, Santi, Currás, Dimas (Casais, min.70), Javi, Adrián Negro (Carrera, min.80), Iván, Pardelo (Juan, min.65).
Goles: 1-0, min.40: Rubén tras unha saída dende atrás; 1-1, min.92: Juan de penalti.
Expulsións: os muxiáns Santi Papi e Javi na segunda metade.
Lesión: o local Torreira.

No minuto 90 e de penalti empataba o Muxía na Rocheira. E o fixo tras un bo primeiro tempo do cadro de Papi, que comezaba perdoando con dúas boas ocasións de Iván Lago e Pardelo. O Coristanco foise facendo co partido e se metía por diante antes do descanso cun tanto de Rubén. Na segunda puideron ampliar a renda para os locais Gonzalo, Magovi e Cancela, e máis cando o Muxía quedaba con 10. Pero non sentenciou e acabou pagándoo, pois xa no tempo engadido, Juan facía o empate tras dende os 11 metros.

Laxe - Corcoesto (3-0)

LAXE: Diego, Samuel, Jacinto, Pailos, Samu Xuv, Gora (Adrián, min.80), Borja, Roi (Ventura, min.46), Mandi (López, min.46), Felipe, Carrabete (Zurich, min.46).
CORCOESTO: Luís, Ángel, Sergio, Germán, Longo, Pablo, Javi, Xabi (Uru, min.80), Couto (Patelo,m in.65), Martín, Héctor.
Goles: 1-0, min.48: Samuel con posición dubidosa; 2-0, min.60: Samuel; 3-0, min.80: Zurich.

Non fixo mal partido o Corcoesto pero este Laxe está moi ben. Foi unha primeira metade moi igualada, con intensidade pero co xogo algo lento. O Corcoesto intentábao como un tiro de Pablo á cruceta ou unha boa xogada de Martín. Protestaron os visitantes o gol de Samuel á volta do descanso, nun Laxe que fixo 3 cambios e comezou a segunda con moita forza. A partir de aí, foi clave foi o baixón físico do Corcoesto, e os laxenses dominaron a última media hora con solvencia, puidendo ampliar a renda, pero un par de balóns foron rexeitados polos paos, e Zurich fallaba un penalti

Alcaián - Cerqueda (0-1)

ALCAIÁN: Martín, Pombo, Marcos (Corral, min.75)Rubi, Iván, Facal, David, Pichel (Dani, min.70), Framil, Daviciño, Marqués.
CERQUEDA: Rubén, Bastón, Javi, Pablo, Juanjo, Dani, Manu, Lorenzo, Dani Seaia, Dieguito, You (Iván Ponte, min.89).
Gol: 0-1, min.50: Dani de falta directa.

Só se podía marcar a balón parado ante o estado do campo, e así o fixo o Cerqueda, que marcou e sufriu unha longa segunda metade na que o Alcaián o intentou de todas as maneiras. Na primeira apenas houbo ocasión, máis que un cabezazo de Dieguito a centro de Dani Seaia. Pola súa banda o Alcaián probaba dende lonxe, ademais de buscar ben as entradas polas bandas. Tanto Marqués como facal tiveron un par de ocasións cada un na primeira e tamén na sgeunda metade, pero a sorte non estivo cos locais. De feito, tralo gold e Dani de falta directa, o Alcaián se puxo a encerrar aos visitantes con balóns arriba e o Cerqueda tivo que sufrir, saltar e sacar ducias de balóns.

Ameixenda - Camelle (2-4)

Barreiro celebra o 0-2 no Ameixenda-Camelle-Foto-SD Camelle

AMEIXENDA: David, Álvaro, Alberto, Grille (Jorge, min.46), Bruno, Mateo, Manu (Demetrio, min.46), Jesús, Rioliño, Javi (Rodrigo, min.80), Ramiro.
CAMELLE: Purrúa, Carlos de Dido, Valiña, Manuel, Matías, Mario, Barreiro (Mauri, min. 90), Tedín (Varu, min. 58), Jose (René, min. 69), Javi Rañal (Coruña, min.81), Miguel Riveiro.
Goles: 0-1, min.15: Matías dende a súa propia área; 0-2, min.35: Barreiro; 0-3, min.55: Miguel Riveiro; 1-3, min.60: Mateo; 1-4, min.90: Barreiro; 2-4, min.93: Mateo.

Foi o vento un dos protagonistas do choque sabatino entre Ameixenda e Camelle no San Paio de Refoxos. O partido comezaba cun Ameixenda incisivo que metía ao Camelle na súa área. Pero un "tiro-despexe" de Matías dende a súa área era tragado polo meta ceense para que o Camelle se puxese por diante e se sacudise o control local.
O Camelle melloraba, baixando o balón e tocando, ante un Ameixenda que tamén combinaba pero que non era capaz de chegar con profunidade. Barreiro facía o segundo antes do descanso a pesar da igualadade.

A segunda comezaba de novo co Ameixenda volcado, desta volta co vento a favor, pero co gol de Miguel Riveiro aos 10 minutos, que case que mataba as esperanzas locais. E iso que o intentaban a balón parado de todas maneiras. Mateo foi o único capaz de superar a Purrúa en dúas inútiles ocasións.