Chega unha nova xornada de Fútbol costeiro cargada de bos partidos. Unha fin de semana marcada polas semis das Ligas Comarcais de Fútbol Sala LCFs, que se celebrará hoxe venres nos pavillóns de Baiñas e Vimianzo.
Xa en materia, E coma sempre, arrincamos o repaso á Previa da Xornada pola Preferente - Senra Sport, na que os nosos xogan na casa, pero ante rivais diferentes. O XSC recibe a todo un Noia, 2º na táboa, con 12 puntos máis que os xalleiros, no que pode ser a verdadeira proba de toque para ver se os de Coméndez teñen opcións de colarse, alomenos, na Promoción. Pola súa banda, o Dumbría recibe no Conco a un histórico en horas baixas, como é o Betanzos.
Xornada importante na 1ª Autonómica - Clínica Vértebra. O líder, o Sofán, tras sumar só unha vitoria nos últimos 5 partidos, ten que recuperar a boa liña de resultados de meses atrás e pode comezar en Padrón, ante un Flavia moi irregular. Ademais, o Baio terá unha proba enorme na Pobra, ante o equipo que o precede e que lle saca 5 puntos. Por detrás, Malpica e Soneira queren manter a boa liña. O Soneira seguirá escalando se gaña ao Cordeiro, que ten 2 puntos máis. Mentres, o Malpica poderá sumar en Silleda, e de paso facerlle un favor aos veciños da zona baixa, Corme e Esteirana, que terán choques comlicadísimos, o Corme en Bertamiráns ante un filial que non se lle dá nada ben aos equipos costeiros; e a esteirana ante o Unión, outro dos de arriba.
Partidos interesantes na 2ª Autonómica - ES Bazarra. O líder, San Lorenzo, recibe a un bo Mazaricos, mentres que o Outes non pode fallar ante a visita do Buño, outro equipo da zona alta. Zas e Castriz terán choques complicados ante Cee e Seaia, dous equipos bastante irregulares esta tempada. A atención céntrase na zona baixa. O derbi camariñán entre Camelle e Camariñas parece clave para os camelláns. Ademais, o Montelouro poderá achegarse á salvación ante o equipo que precisamente a marca, o Cabana. O choque das Redondas será clave.
Na 3ª Autonómica - Clínica Xunqueira non poden fallar os de arriba, nin o Ameixenda contra o Castrelo o sábado, nin o líder, o Cerqueda ante a visita do mellorado pechacancelas, o Laxe de Rochi. Ademais, o Nantón-Corcubión valerá para ver se o cadro corcubionés vai pelexar polo ascenso directo ou quédase ca promoción, mentres que o Muxía quere meterse xa de cheo nesa pelexa se vence en Lombáns a un tocado Lira.
Última ocasión para o XSC de unirse á loita pola Fase Ascenso á Liga Galega Xuvenil, pero en fronte terá ao poderoso Dumbría, aínda invito esta tempada. Os Miúdos queren confirmar a súa alternativa na visita ao Camariñas, onde unha vitoria o colocaría de novo entre as dúas prazas, dependendo, iso si, do que faga o Cabana ante o Porteño, que daba a sorpresa a semana pasada e que é capaz de todo.
Nas Ligas Autonómicas, difícil papeleta para o Dumbría da División de Honra Cadete - Aluminios Dumbría ca visita ao Areosa, e máis, se cabe, a do XSC ao líder da Liga Galega, o Viveiro. En todo caso, estaremos atentos ao último partido da primeira fase da Liga Galega Infantil - Aluminios Dumbría, pois o cadro dumbriés necesita sumar algún punto máis para afrontar con algunha garantía o Play Off por evitar o descenso. O Conco terá que arroupar aos de Huelvis e Pablo Conde na tarde do sábado.
E xa nos Veteranos, choques fantásticos na 1ª División. O novo líder, o San Román, terá uha proba de lume ante o Dumbría, 4º clasificado a só 4 puntos. Ademais, o Coristanco, actual campión, enfróntanse a todo un Soneira, actual campión de Copa e un dos sempre favoritos, que este ano non pasa polo seu mellor momento.
