Pasou de novo a noite máis máxica do ano. O San Xoán invadíu, máis que nunca, a Costa da Morte. Ducias de praias prenderon as cachelas, cacharelas, laradas, lumeiradas, lumarada, lumiños, fogueiras… e bailaron ao ritmo das orquestras máis marchosas. O San Xoán segue crecendo na bisbarra, e mentres hoxe disfrutamos do festivo a nivel galego, lavamos a cara cas 7 herbas do San Xoán e non pensamos en que o ano que vén teremos que ir traballar o día 24.

E foi onte unha noite especial. A superlúa vixiaba imponente, as mareas vivas mantiñan en vilo medio país, e o vento do nordés levaba as muxicas de viaxe por todo os areais. Menudo triple espectáculo, para engadirlle ao xa hipnotizante queimar das laradas.

Ademais, e dada a falta de capturas, o xurelo foi digno substituto dunha sardiña escasa e cara. Pero o que nunca falla é o churrasco. Ducias de festas decantáronse por rei das brasas, mesmo para completar a fame que abría o xurelo.

Nós estivemos no Ézaro, onde houbo doble cacharela. Aló, a festa durou o que o lume tardou e prender un barco (que simbólica morte a dunha embarcación nas lapas do San Xoán), pois co vento case que non se paraba.

Pero tamén estivemos noutros sitios.

San Xoán en Íntegro

O pasado venres tivo uníronse o Centro de Día de Maiores de Cabana de Bergantiños cos usuarios/as do Centro de Día e ocupacional de ÍNTEGRO e os familiares de ambos centros, para celebrar o San Xoán.
Tratouse dunha xornada lúdica-festiva, onde os/as usuarios/as dun e doutro centro compartiron experiencias, fixeron xogos de psicomotricidade, de bolos, diana, tiro a canasta, karaoke, xogos de mesa...compartiron entre todos e os seus familiares un xantar.

Churrascada da SD Ameixenda

Os que tamén adiantaron o San Xoán foron os da SD Ameixenda. O pasado venres facían unha churrascada no lugar ceense, e pasaron un día en familia, con Jorge Parri.

Novas relacionadas

• As 7 herbas de San Xoán.
• San Xoán 2012: Fermosa noite vermella de San Xoán.
• San Xoán 2011: Herbas, sardiñas e lume para unha noite cada vez máis meiga na Costa da Morte.
• San Xoán 2010: O lume bailou a ritmo de blues .
• San Xoán 2009: A Costa tamén vivíu a súa noite meiga a lume lento.
• San Xoán 2008: Un San Xoán sen cacharelas pero con blues e herbas.

Fonte

• Redacción de QPC ([email protected]).