O Festival de Cans viviu a emocionante estrea do videoclip de Fernando Fraga e Juan Lesta “Para Kepa”
Emocionante estrea mundial a que se viviu esta fin de semana no Festival de Cans con acento vasco/costeiro. Unha completa comitiva da Costa da Morte acodía para presenzar a estrea do videoclip “Para Kepa”, un proxecto de Bela Fisterra Producións, feito por Juan Lesta, coa música de Fernando Fraga, e rodado en Fisterra. Porque Fisterra foi o último, e o primeiro, lugar que visitou Kepa Junquera antes e despois do seu ictus.
Pepe Formoso, Fernando Fraga, Nestor Fidalgo, Juan Lesta, Modesto Fraga e a familia de Pazos de Merexo, acompañaban ao artista euskaldún nesta especial visita ao singular festival de cine desta aldea do Porriño.
Kepa segue loitando tras anos de rehabilitación e de adaptación, non exenta de sacrificios e superación, como pode verse no documental BERPITZU de Fermín Aio. Pero puido achegarse a Cans a gozar deste momento cheo de emocións.
Foi Juan Lesta o encargado de presentar o vídeo, antes do rotundo o aplauso que levou Kepa do auditorio de Cans, que lle ten adicado a un dos Ghaliñeiros onde se desenvolven actividades e onde mesmo ten tocado o seu amigo Pazos de Merexo.
O vídeo ten como protagonista á Costa da Morte, ademais do acordeón de Fernando Fraga e a pandeireta de Nestor Fidalgo. Tamén deu a súa aportación artística en forma de escultura de Guille Lourido, natural de Corcubión e afincado en Asturias. Unha enorme escultura de Kepa, trikitixa en man, que Kepa vía en directo por primeira vez ese día.
