Unha semana estiveron catro efectivos especializados do Grupo de Emerxencia Supramunicipal (GES) do Concello de Muros axudando na zona afectada pola DANA. Entre eles, Miguel Montero (na foto o segundo pola dereita), un bombeiro con amplísima experiencia en misións de rescate internacionais.

Durante unha semana, estiveron axudando en Catarroja e Paiporta cos Bombeiros da Coruña e a UME. Os traballos consistiron na inspección e retirada dos vehiculos arrastrados pola riada, limpeza e búsqueda de desaparecidos. Tamén realizaron tarefas de control da calidade do aire e achiques de garaxes e ocos de ascensores.

“Desde o Concello de Muros, seguimos pendentes das peticións que nos chegan a través das canles oficiais para ver onde se pode axudar aos municipios máis afectados”, asegura a alcaldesa, María Lago.
A concelleira de Seguridade, Sandra Maneiro, agradece de novo “o traballo do GES e Protección Civil de Muros, ademais de agradecer tamén a Miguel e Rubén polo seu esforzo e por informarme a diario do traballo que realizaban”. Chegaron a Muros moi cansados pero satisfeitos polo traballo, axudando aos veciños e veciñas de Valencia.