Sempre Pazos de Merexo!

Este pasado luns 25 de agosto, Merexo volveu converterse na capital mundial do acordeón. A Casa da Forreira volveu a abrir as portas por segunda vez, para render unha homenaxe ao Mestre da memoria, Manuel Pazos Redonda.
Por alí achegáronse cos seus trebellos diversos artistas do acordeón, e doutras artes. A eira da Casa da Forrreira, onde Pazos tocara con Kepa Junquera, o seu neto Adrián Lago, Xurxo Souto, Xosé Manuel Varela, os Ignacios Moncho e Anxo, Arxires, Rubén García, Jaime de Isaura, Argantel e Dena conseguiron crear, coa súa música, unha velada marabillosa que arrincaba ás 19:00h e remataba ben entrada a noitiña.
Comezaba a xornada lembrando a Pazos de Merexo e entre anécdotas que contaba Xurxo, Adrián o neto de Pazos arrincaba cunha peza do Mestre, a cal seguían o resto do elenco.
Houbo momentos moi emotivos, Arxires tocou a peza que lle compuxo, imposible non emocionarse; e tamén Dena, a sacristana de San Martiño, que fixo delicias coa súa inmensa voz. Coa noitiña, Moncho e Anxo remataron coa festa o grande.
Podedes ver a primeira parte da xornada da man de Xosé Manuel Varela:
