5 colexios de Cee e Camariñas pecharán cunha regata a campaña "O Mar na Escola"

5 colexios de Cee e Camariñas pecharán cunha regata a campaña "O Mar na Escola"

10:55 02/06/11

A Escola de Vela Cataventos e o Club Marítimo Carrumeiro porán este sábado o broche de ouro ao programa "O mar na escola", coa organización dunha regata na que participarán cinco centros escolares de Cee e Camariñas.

A iniciativa de "O Mar na Escola", coa que colabora Ferroatlántica e o Concello de Cee, desenvolveuse durante os meses de marzo, abril e maio e este sábado culminará coa regata "III Competición en idade escolar" na que os nenos e nenas demostrarán os coñecementos adquiridos en navegación.

Os colexios participantes son os de Cee, Colexio Manuela Rial Mouzo e CEIP Eugenio López, que estarán con tres embarcacións; e de Camariñas, O Areal, o da Ponte do Porto e o Pedra da Aguia, tamén con tres embarcacións.

O sábado 4 de xuño ás 15:00h levará a cabo o rexistro de participantes e ás 16:00 darase o pistoletazo de saída á regata. Está previsto que a entrega de premios leva a cabo ás 18:00h.

Programa lúdico-educativo

O programa, que se desenvolve xa desde fai dez anos en Camariñas, imprantouse en Cee fai tres cun gran éxito de aceptación e este ano non foi menos. Durante tres meses os alumnos dos centros de Cee e Camariñas gozaron da práctica da vea combinada con clases teóricas e prácticas. Ademais de navegar, os nenos aprenderon a facer nós mariñeiros, normas de seguridade, nomenclatura náutica, achegamento á cultura mariñeira e os ventos.