Martes. 16.07.2024
El tiempo

11 bandas asentan o Retella Fest de cara á súa cuarta edición

  • O Retella Fest de Ponteceso anuncia os horarios e cartel definitivo.
  • Sobrinus (Madrid) e Deleiba (Galicia) encabezan o cartel da cuarta edición que terá lugar en Tella o venres 28 e o sábado 29 de xuño
  • O venres 28, a partir das 20h, a Asociación Veciñal Os Seixos organiza unha quedada de bicicletas clásicas no marco do festival pontecesán.
  • A entrada para o festival é libre e haberá á venda comida e bebida para axudar á organización do evento.
Cartel Retella Fest 2024
11 bandas asentan o Retella Fest de cara á súa cuarta edición

Queda menos para os 28 e 29 de xuño, cando e celebre en Tella o Retella Fest. A Asociación Os Seixos vén de publicar os horarios e a distribución por días dos grupos que tocarán na cuarta edición do festival, pegando un salto importante con respecto ao ano pasado, duplicando o número de bandas, chegando ás 11 e sumando un segundo día á festa musiqueira.

Porque o Retella Fest, que ten como obxectivo contribuír á oferta cultural de Ponteceso, está pasando de ser unha cita de amigos a querer converterse nunha cita consolidada co rock na Costa da Morte. Pero sempre mantendo a súa esencia de apostar polo rock feito en galego e en Galicia.

O venres 28 o festival comeza ás 21:00 horas cunha sesión con DJ Chaperraco para quentar motores para a música en directo que chega a partir das 21:40 horas coa banda de rock carballesa Rusty Nuts, á que lle seguirán os composteláns Radio Zapa!, os bergantiñáns Lóstregho e Lowcos.

Encabeza o cartel desta primeira xornada os madrileños Sobrinus. A súa música é ecléctica por natureza, rock no básico con toques de funk, jazz, punk e hardore. Este grupo, que nos anos 90 se situaba entre as bandas de culto no panorama estatal, volveu en 2017 tras un longo parón, e este verán chega ao Retella Fest para presentar o seu novo disco ‘Renace’ na súa única data confirmada en Galicia.

O sábado 29 a xornada comeza ás 20:30 horas con Portofranco, aos que lle seguirán o proxecto da coruñesa Cristina Pena, Lost Minnow, o power dúo Mascada, a mestura entre música tradicional e rock duro de Sons of Exodus e a formación underground xurdida en Valencia Technopork. Pechará a noite unha sesión dj.

O grupo galego Deleiba é o cabeza de cartel do sábado en Tella. A banda nace na vila mariñeira de Muros e supón a xuntanza de cinco músicos de diferentes tradicións musicais. Teñen formado parte de grandes citas coma o festival Resurrection Fest, o Tsunami Xixón, o Caudal Fest ou o Castelo Rock. Neste 2024, a banda presentará un novo álbum producido por Iago Pico (Tanxugueiras, Nao), do que ofrecerán un adianto no Retella Fest.

Máis ca música

Ademais de música, a Asociación Veciñal Os Seixos organiza o venres 28 de xuño unha quedada de bicicletas clásicas a partir das 20:00 horas e fai un chamamento a todo aquel que conte con unha a achegarse para compartir inquedanzas sobre a temática ao tempo que se goza cos concertos.

A entrada para o Retella Fest será libre. Ademais, a organización terá á venda comida e bebida para apoiar o evento e que a súa continuidade sexa posible.

Horarios

Venres 28 de xuño

  • 21:00 h: DJ Chaperraco
  • 21:40 h: Rusty Nuts
  • 22:45 : Radio Zapa!
  • 00:00 h: Sobrinus
  • 01:30 h: Lóstregho
  • 02:30 h: Lowcos
  • 03:30 h: DJ Chaperraco

Sábado 29 de xuño

  • 20:30 h: Portofranco
  • 21:20 h: Lost Minnow
  • 22:10 h: Mascada
  • 23:30 h: Deleiba
  • 00:45 h: Sons of Exodus
  • 02:00 h: Technopork Noize
  • 03:00 h: DJ Residente

 

Máis novas festivaleiras

Comentarios