A Deputación da Coruña celebrou onte no Hotel NH Finisterre a I Gala de Turismo da Deputación, onde fixo entrega dos premios de turismo aos proxectos gañadores. Entre eles, dous proxectos da Costa da Morte como son o Hotel – Restaurante Balarés (Ponteceso) e o Bela Fisterra.
 Ademais, a entidade provincial entregou recoñecementos a Eu fun de vivo (San Andrés de Teixido, Cedeira), Nacional VI, e Casa Peto (Outes); e uns distintivos aos 8 xeodestinos da provincia e aos 2 entes de xestión das cidades de A Coruña e Santiago de Compostela,

Proxectos premiados

Un xurado composto polas técnicas de turismo de Carballo, Dumbría e Ames, Maite Parga, Ada González Fernández e Sonia Moure Oliveira respectivamente, e o profesor da facultade de turismo da Universidade da Coruña, Carlos Rodríguez Carro, foi o encargado de elixir ás propostas gañadoras nas cinco categorías.

Na primeira delas, mellor iniciativa de innovación e calidade turística, o xurado decidiu premiar ao Hotel – Restaurante Balarés (Ponteceso). Na segunda, mellor iniciativa de sostibilidade social aplicada ao turismo, a Bela Fisterra.
Na terceira, mellor iniciativa da posta en valor da autenticidade do territorio o premio é para o proxecto “Eu fun de vivo” de Sergio Muíño (Cedeira), de posta en valor sustentable de San Andrés de Teixido.
A cuarta categoría, o mellor proxecto de turismo emerxente, o premio é para “Ruta Nacional VI”, un ‘road trip’ pola histórica carreteira N-VI entre Madrid e A Coruña.
E, na última categoría, toda unha vida dedicada ao turismo, o xurado decidiu recoñecer a traxectoria de Dolores García, “Lolita”, cociñeira e copropietaria de Casa Peto (Outes).

Todos eles recibiron unha peza de Jorge Eiroa que consistía nun nó, que significa conexión, vínculo, forza, en representación do sector turístico, que traballa unido e forte, creando unha oferta competitiva e que poña en valor conceptos como a sustentabilidade, a defensa do territorio e a cultura e a identidade.