A XXII Mostra do Encaixe de Camariñas abre as súas portas

08:35 04/04/12

A XXII edición da Mostra do Encaixe de Camariñas comezará hoxe a partires das 15:00 cando abra as súas portas ao público, aínda que o acto oficial de inauguración está previsto para as 17:00 horas. Os asistentes na primeira xornada poderán desfrutar das demostracións das máis de 30 palilleiras infantís das escolas municipais, dos primeiros desfiles de moda de noveis e grandes deseñadores, así como das exposicións que presentarán as 14 delegacións internacionais de encaixeiras.
Tamén terán a oportunidade de visitar a zona de ocio e degustación gastronómica que será una das novidades de esta edición. “Este será un espazo ideal para compartir en familia, xa que mentres os rapaces e rapazas participan de divertidos obradoiros, os pais poden aproveitar para degustar distintos produtos nacionais”, explica a concelleira delegada da Mostra, Sandra Insua.

A Mostra estará aberta ao público ata o 8 de abril en horario continúo dende as 11:00 á 21:00 horas, e nela haberá curiosidades como as exposicións de Tocados realizados de Encaixe de Camariñas e enxovais.

Día do voluntariado

Esta nova edición da Mostra é a primeira en dedicar a súa celebración a unha causa solidaria. Este ano, por ser o décimo aniversario do afundimento do Prestige, decidiuse dedicar o evento ao voluntariado.
Así, mañá, xoves 5 de abril, realizarase unha xuntanza de voluntarios e voluntarias, que ademais de compartir as súas experiencias, contarán con un picnic e ruta guiada polas praias onde estivo a Marea Branca. En homenaxe a este movemento, distribuiranse máis de 700 lazos de cores, feitos de Encaixe de Camariñas, dos cales, 200 regálanos as palilleiras locais que queren sumarse ao agradecemento.