Este luns 12 de xuño o alumnado do Club de Ciencia do IES Fernando Blanco de Cee acompañado polo seu profesorado de materias científicas realizaron o Día da Ciencia na rúa. Aínda que inicialmente estaba previsto que se celebrase na Alameda ceense, debido ao mal tempo, houbo que trasladalo ao Pavillón Polideportivo municipal. 
Unha xornada, que contou coa colaboración municipal, formulada polo centro para que o alumnado mellore a súa competencia comunicativa, científica e divulgativa.

Desde as 10 da mañá ata as 14:15 e pola tarde de 16:15 ata as 17:45 máis de 450 alumnos e alumnas do IES Agra de Raíces, IES Lamas de Castelo, CEIP Vila de Cee, CPR Manuela Rial e o do propio Fernando Blanco puideron ver e participar nos experimentos e xogos científicos que preparou o Club de Ciencia do Fernando Blanco.

Ao chegar ao Pavillón o alumnado era recibido polo profesorado do Fernando Blanco que lles explicaban o que ían ver e como tiñan que acceder aos diferentes stands. Posteriormente en grupos ían percorrendo os 12 postos onde alumnado do Club de Ciencia facían os experimentos e xogos científicos e explicaban en que consistían ademais de animalos a participar nos mesmos.

Houbo un stand onde se podían construír gafas 3D, outro no que se extraía o ADN dos amorodos e logo se podía ver a través do microscopio, noutro posto facíase unha actividade de esferificación de alimentos, houbo un taller de mecánica, construción de cúpulas de Leonardo, xogo do tamgram e de Torres de Hanoi, un Pasapalabra científico, etc.